दमक, १० भदाैं ।  अन्तर्राष्ट्रिय आमन्त्रण दोश्रो ताप्लेजुङ गोल्ड कप फुटबल प्रतियाेगिता २०८१ को उपाधि मोरङले चुमेको छ । सोमबार सम्पन्न फाईनल खेलबाट सिरहाको सलहेस युथ क्लबलाई १–० गोलअन्तरले पराजित गर्दै मोरङको सगरमाथा युथ क्लबले उपाधि चुमेकाे हो ।

मोरङले सुरुवाती खेलको दोश्रो मिनेटमै गरेको गोल नै जितका लागि निर्णायक बन्यो । बिजय भुजेलले सुरुवाती खेलमै प्रहार गरेको बलले जाली चुमेसँगै फाइनल जितका लागि पर्याप्त बन्यो । निर्धारित समय अवधि भरि दुवै समहुले आक्रामक ढंगले खेलेपनि सिरहाले कुनै गोल फर्काउन नसक्दा उपविजेतामै चित्त बुझाउन बाध्य भयो ।

प्रतियोगिताको बिजेता टिम मोरङले उपाधि चुमेसँगै नगद ५ लाख रुपैयाँ र उपबिजेता सिरहाले २ लाख ५० हजार ५ सय ५५ रुपैयाँ सहित ट्रफी, मेडल र प्रमाण पत्र प्राप्त गरेका छन् । खेल अवधि भरि बिभिन्न बिधामा उत्कृष्ट बनेका खेलाडीलाई समेत उचित नगद पुरस्कार गरिएको छ ।

लाखे जात्रा समितिद्वारा संचालित दाेस्राे संस्करणकाे प्रतियाेगिता भाद्र ३ गतेबाट सुरु भएको थियाे । प्रतियोगितामा ८ टीमलाई सहभागी भएका थिए । भारतका १ सहित जिल्ला बाहिरका ७ टीमले सहभागीता जनाएका थिए ।

गत वर्षको संस्करणमा आमन्त्रण गरिएको भन्दा अन्य फरक टीमलाई यस वर्षको संस्करणमा समाबेश गराइएको थियो ।