दमक । किरात याक्थुङ चुम्लुङले लिम्बुवान र तत्कालीन गोर्खा राज्यबीच भएको ऐतिहासिक नुनपानी सन्धिको २५२औँ वर्ष स्मरण गर्दै प्रधानमन्त्रीका नाममा ज्ञापनपत्र बुझाएको छ ।

किरात याक्थुङ चुम्लुङ केन्द्रीय कार्यसमितिको समन्वयमा विभिन्न संघसंस्था र राजनीतिक दलका प्रतिनिधिको सहभागितामा झापाका प्रमुख जिल्ला अधिकारी शिवराम गेलालमार्फत प्रधानमन्त्रीलाई ज्ञापनपत्र बुझाइएको हो ।

बुधबार जिल्ला अध्यक्ष सेसेहाङ फियाकको नेतृत्वमा गएको टोलीले ऐतिहासिक नुनपानी सन्धिको सम्मान र त्यसको कार्यान्वयनका विषयमा सरकारको ध्यानाकर्षण गराएको जनाएको छ ।

यस्तै बिहिबार अरूण पुर्वकाे अन्य जिल्लाहरू इलाम, पान्थर, ताप्लेजुङ, तेह्रथुम, संखुवासभा, धनकुटा, सुनसरी र माेरङकाे जिल्ला प्रशासन र इलाका प्रशासन कार्यालय मार्फत पनि स्मरण पत्र प्रधानमन्त्रीलाइ पठाइएकाे कियाचु लिम्बुवान प्रदेश समितिका मुख्यसचिव दिलकुमार लावतीले बताउनु भयाे ।

चुम्लुङका अनुसार विक्रम संवत् १८३१ साउन २२ गते लिम्बुवान र गोर्खा राज्यबीच लालमोहर अर्थात् नुनपानी सन्धि भएको थियो । दुई वर्षसम्म चलेको युद्धपछि भएको उक्त सन्धिमा लिम्बुवानको पुख्र्यौली भूमि, परम्परा, थिति र अधिकारको संरक्षण गर्ने सहमतिसहित दुवै पक्षले

नुनपानीको सपथ लिएको इतिहासमा उल्लेख रहेको किरात याक्थुङ चुम्लुङ केन्द्रीय कार्यसमिति सदस्य धर्म लक्सम्बाले जानकारी दिनुभयो ।
चुम्लुङले ऐतिहासिक सन्धिको भावना र सहमतिलाई राज्यले सम्मान गर्दै त्यसअनुसारका प्रतिबद्धता कार्यान्वयन गर्न सरकारसँग आग्रह गरेको छ ।