धरान, सुनसरी । बि.सं. १८३१ साउन २२ गते लिम्बुवान र गोर्खा कान्तिपुरबिच भएको तसल्ली मुलुकी लालमोहर (नुनपानी) सन्धिको स्मरण गर्दै ऐतिहासिक कार्यक्रम सम्पन्न भएको छ । साउन २२ गते शुक्रबार २५२ बर्ष अघि भएको सन्धिको स्मरण गर्दै सुनसरी विजयपुर धरानस्थित भानुचोकमा स्मरण कार्यक्रमको आयोजना गरिएको हो ।

किरात याक्थुङ चुम्लुङ संघीय समितिको समन्वयमा ४१ भन्दा धेरै विभिन्न संघ संस्था र राजनीतिक दलहरुको संयुक्त उपस्थितिमा उक्त कार्यक्रमको आयोजना गरिएको किराचु संघीय समितिले जनाएको छ ।
सुनसरी, धनुकटा, मोरङ र झापाका विभिन्न स्थानबाट लालमोहर स्मरण कार्यक्रममा सहभागिता जनाएका थिए ।
लिम्बुवानले आजभन्दा दुई सय ५२ बर्ष अघि गोर्खा कान्तिपुरका शासक पृथ्वीनारायण शाहसँग पटक–पटक युद्ध लढ्दापनि जित्न नसकेपछि अरुणनदी किनारमा अन्तिम युद्ध पश्चात लालमोहर तसल्ली मुलुकी सन्धि भएको थियो । उक्तसन्धिलाई नुनपानीको सन्धिपनि भनेर चिन्ने गरिन्छ ।

कार्यक्रममा किरात याक्थुङ चुम्लुङका पूर्व उपाध्यक्ष समाजशास्त्री डा. कमल तिगेलाले लालमोहरमा उल्लेख भएको वाक्यांश पढेर त्यस लालमोहरमा उल्लेख भएको शब्दको ब्याख्या गरेका थिए । उक्त लालमोहरको सकली दस्तावेज नेपाल सरकारको अभिलेखमा रहेको स्पष्ट पारेका थिए ।
कार्यक्रममा किरात याक्थुङ चुम्लुङका संघीय अध्यक्ष गोविन्द आङवुङ, नेपाल जनमुक्ति पार्टीका अध्यक्ष केपी पालुङवा, संघीय लोकतान्त्रिक राष्ट्रिय मञ्चका अध्यक्ष कुमार लिङदेन, जसपाका केन्द्रीय सदस्य ताजुव लिम्बु, उज्यालो नेपालका केन्द्रीय सदस्य जेन्टल लावती, विजयपुर संरक्षण समितिका प्रवक्ता अमित थेवे, कियाचु लिम्बुवान प्रदेश समितिका सचिव दिलु लिङदेन लावती लगायत वक्ताहरुले १८३१ साउन २२गतेको तसल्ली मुलुकी लालमोहर सन्धि बारे चर्चा गरेका थिए ।

यसैगरी लालमोहर स्मरण कार्यक्रम अन्य जिल्लाहरु ताप्लेजुङ, पान्थर, इलाम, तेह्रथुम र संखुवासभामा समेत भएको कियाचुले जनाएको छ ।
यसैगरी चुम्लुङको समन्वयमा लालमोहर सन्धिको स्मरण गर्दै अरुण पूर्वको नौ जिल्लाको सिडियो कार्यालय मार्फत प्रधानमन्त्री बालेन्द्र शाहलाई पठाइएको स्मरणपत्र समेत उक्त कार्यक्रममा वाचन गरिएको थियो ।