ललितपुर, उपत्यका । लिम्बु पत्रकार संघको उपत्यका तदर्थ समिति गठन भएको छ । आइतबार ललितपुरस्थित किरात याक्थुङ चुम्लुङको संघीय कार्यालयमा सम्पन्न भेलाले अर्जुन मादेन लिम्बुको संयोजकत्वमा ७ सदस्यीय तदर्थ समिति गठन गरेको हो ।

नवगठित समितिको सदस्य सचिवमा प्रकाश लिङ्देन चयन भएका छन् भने सदस्यहरूमा विशाल नाल्बो, नुमा थाम्सुहाङ, निर्मल सुब्बा ‘आशिष’, राजेन्द्र केरुङ र पर्सु थलङ चयन छन् । काठमाडौं उपत्यकामा रहेका लिम्बु समुदायका भाषा, लिपि, संस्कार, संस्कृति, इतिहास, पहिचान तथा समसामयिक सवाललाई पत्रकारितामार्फत सशक्त रूपमा उठाउने उद्देश्यले तदर्थ समिति गठन गरिएको लिपसले जनाएको छ ।

किरात याक्थुङ चुम्लुङका संघीय महासचिव अमर तुम्याहाङको प्रमुख आतिथ्यतामा भएको उक्त कार्यक्रमको अध्यक्ष लिम्बु पत्रकार संघका अध्यक्ष सन्देश सुब्बाले गरेका थिए । नेपाल आदिवासी जनजाति पत्रकार महासंघका सचिव माला पालुङवा, रेडियो काबेलीका अध्यक्ष तथा प्रेस सेन्टर नेपालका उपत्यका प्रदेश समिति अध्यक्ष लोकेश लिवाङ, फोनिजका संघीय सदस्य दिनेश लिम्बु र निर्देशक, लेखक तथा फिल्मकर्मी सागर केरुङ लगायतले विग मिडियालाई मात्र प्राथमिकता दिने प्रवृत्तिभन्दा बाहिर निस्केर साना तथा स्थानीय सञ्चारमाध्यमले गरिरहेको कामको मुल्याङकन गरेर अघि बढुनपर्नेमा जोड दिएका छन् ।

पछिल्लो समय डिजिटल संचारमा भ्यूज र फ्लोअर्सको आधारलाई मापन गर्न नहुने बताउँदै पत्रकारिताको गुणस्तर, विषयवस्तुको गम्भीरर्यता, खोज अनुसन्धानात्मक समाचारहरुलाई बढि प्राथामिकता दिनुपर्ने बताएकाछन् । झोले प्रवृत्तिको पत्रकारिताबाट मुक्त हुनुपर्ने आफ्नो पहिचान र भाषालाई थप शसक्त रुपमा बुलन्द गर्दै समुदायकाे अावाज र व्यावसायिक पत्रकारितामा लिम्बु पत्रकारहरू पनि सकृय हुनेपर्नेमा वक्ताहरूले जोड दिएका छन् ।

संघले लिम्बु पत्रकारहरूलाई एकताबद्ध गर्दै आगामी दिनमा समुदायका मुद्दालाई थप प्रभावकारी रूपमा सार्वजनिक बहसमा ल्याउने र पत्रकारिताको माध्यमबाट समुदायका आवाजलाई राष्ट्रिय बहससम्म पुरयाउने लक्ष्य लिएको लिम्बु पत्रकार संघका अध्यक्ष सुब्बाले बताए ।