दमक/ कोरोना संक्रमण र यसलाई रोक्न लगाइएको निषेधाज्ञाका कारण उद्योगी व्यवसायीहरु पलायन हुने अवस्था सिर्जना भएको भन्दै दमक उद्योग वाणिज्य संघले सहकारी तथा वित्तिय संस्थाका साझा संस्थाहरुको ध्यानाकर्षण गराएका छन् ।

दमक उद्योग वाणिज्य संघले दमकमा सञ्चालित कतिपय बैंक तथा सहकारी संस्थाका प्रमुख एवं प्रतिनिधिहरुसंग सो बिषयमा प्रतिनिधिमुलक छलफल गरेर ध्यानाकर्षण पत्र समेत बुझाएको छ ।

संघका अध्यक्ष गोकुल श्रेष्ठको नेतृत्वमा संघको टोलीले व्यवसायीहरुका विभिन्न तीन बुँदे माग समेटिएको ध्यानाकर्षण पत्र बुझाइएको संघका वरिष्ठ उपाध्यक्ष गोपाल गुरागाइँले जानकारी दिएका छन् ।

संघले बुझाएको ध्यानाकर्षण पत्रमा लकडाउन अर्थात पूर्ण निषेधाज्ञा अवधिभरको ब्याज छुट गर्न, बैंक तथा वित्तिय संस्थाहरुले व्यवसायिक क्षेत्रमा गरेको ऋण लगानीको साँवा तथा ब्याजका लागि पूर्ण रुपमा निषेधाज्ञा हटेको तीन महिना सम्म ताकेता नगर्न, यस अघि लगानी भएको ऋणमा २० देखि २५ प्रतिशत सम्म ऋण सोही धितोमा थप गर्ने व्यवस्था मिलाउन आग्रह छ ।

संघका तर्फबाट सो ज्ञापन पत्र जिल्ला सहकारी संघका उपाध्यक्ष प्रेम प्रसाद कोइराला र जिल्ला बचत तथा ऋण सहकारी संघका अध्यक्ष तुलाराम न्यौपानेलाई हस्तान्तरण गरिएको वरिष्ठ उपाध्यक्ष गुरागाइँले जानकारी दिनु भयो ।