काठमाडौं। निर्वाचन आयोगमा नेकपा (एकीकृत समाजवादी) र लोकतान्त्रिक समाजवादी पार्टी नेपालमा प्रवेश गर्न चाहने प्रदेश र स्थानीय तहका सदस्यको सनाखत आज सम्पन्न भएको छ ।
निर्वाचन आयोगले नयाँ दल दर्ता भएको मितिले २१ दिन भित्र निर्वाचित प्रदेशसभा सदस्य तथा स्थानीय तहका सदस्यले नेकपा एमाले र जसपा नेपालबाट छुट्टिई गठन भएको नयाँ दलमा प्रवेश गर्न चाहना राख्नेलाई सनाखत गर्न निर्देशन दिए बमोजिम आज अन्तिम सनाखत सकिएको हो ।
प्रदेशसभाका सदस्यलाई सम्बन्धित प्रदेश निर्वाचन कार्यालयमा सनाखत गराएको र स्थानीय तहका सदस्यलाई सम्बन्धित जिल्ला निर्वाचन कार्यालयमा स्वयम उपस्थित भई सनाखत गर्न आयोगले भने बमोजिम व्यवस्था गरिएको थियो ।
राजनीतिक दलसम्बन्धी ऐन, २०७३ (दोस्रो संशोधन अध्यादेश, २०७८) र राजनीतिक दलसम्बन्धी नियमावली, २०७४ (दोस्रो संशोधन) बमोजिम आयोगले नेकपा एमाले र जसपाबाट अलगिएर बनेका नयाँ दलमा प्रवेश गर्न चाहने जनप्रतिनिधिलाई सनाखतको व्यवस्था गरेको हो ।
जनप्रतिनिधिबाट सनाखत भएको विवरणसहितको प्रमाणित प्रतिवेदन सबै जिल्लाबाट निर्वाचन आयोग जम्मा गरेपछि सबै विवरण सार्वजनिक गरिने आयोगले जनाएको छ । आयोगको अनुसार सबै जिल्लाबाट प्रमाणित प्रतिवेदन आइपुग्न कम्तिमा पाँच सात दिन लाग्न सक्ने जनाएको छ ।
Related