इलाम । नेपाली कांग्रेस इलामको अधिवेशन गर्माएको छ । मंगलबार सभापतिका प्रत्यासी युवा तथा सामाजिक व्यक्तित्वको छवि बनाएका नेता डम्बर खड्काले उम्मेद्वारी घोषणा गरेका छन् ।

कांग्रेसको आसन्न १४औं महाधिवेशनमा इलाम सदरमुकाममा पत्रकार सम्मेलन गरेर खड्काले जिल्ला सभापतिको उम्मेद्वारी घोषणा गरेका हुन् । खड्का १३औं महाधिवेशनमा पनि सभापतिमा उठेका थिए । नेता खड्काले जिल्ला सभापतिसहित प्यानलै घोषणा गरेका छन् ।

खड्काको टिमबाट क्षेत्र नम्बर १ को सभापतिमा भीष्म प्रधान र २ बाट मनबहादुर बुढाथोकीले सभापतिमा उम्मेद्वारी घोषणा गरेका छन् । प्रदेश निर्वाचन क्षेत्रीय सभापतिमा भने खड्काको टिमबाट उम्मेद्वारी घोषणा हुन बाँकी रहेको सम्मेलनमा बताइएको छ ।

त्यस्तै, स्थानीय तह अन्तर्गत पालिकाहरुमा समेत सभापतिका प्रत्यासीहरुको उम्मेद्वारी घोषणा गरेका छन् । त्यसअतर्गत इलाम नगरपालिकामा अमृतकुमार श्रेष्ठ, सूर्योदय नगरपालिकामा सोनामकाजी लेप्चा, माई नगरपालिकामा हेमराज लिम्बू, सन्दकपुर गाउँपालिकामा तुलाराम गुरुङ, माइजोगमाई गाउँपालिकामा राजेश देवान, माङसेबुङमा अम्बरबहादुर राईले सभापतिमा उम्मेद्वारी घोषणा गरेका छन् ।

इलामको १० स्थानीय तह मध्ये अन्य चारवटा पालिकाहरु चुलाचुली, फाकफोकथुम, देउमाई र रोङ्मा सहमतिको प्रयास भईरहेकोले अहिले घोषणा नगरिएको क्षेत्र नं. २ का उम्मेद्वार मानबहादुर बुढाथोकीले बताए ।

प्रत्यासी खड्काले आफूले पहिलो चरणमै सभापति जित्ने दाबी गरे । ‘पहिलो चरणमै ५१ प्रतिशत आउँछ,’ उनले भने, ‘मलाई सभापति चाहने धेरै प्रतिनिधि आएका छन् ।’ इलामका ८१ वडाभध्ये ५२ वडा सभापति आफ्नो आफ्नो पक्षमा रहेको खड्काको दाबी छ ।

१४औं महाधिवेशनमा इलाम जिल्ला सभापतिमा कांग्रेसका चारजना नेताहरु आकांक्षी छन् । खड्कासहित वर्तमान सभापति हिमालय कर्मचार्य, पूर्वसभापति केशव थापा र भेषराज आचार्य सभापतिका आकांक्षी हुन् । बाँकी तीनजनाले भने उम्मेद्वारीको औपचारिक घोषणा गरेका छैनन् ।