फिदिम । नेपाल पत्रकार महासंघ, पाँचथर शाखाको आफ्नो वेभसाइट बिहीबार सार्वजनिक गरेको छ । फिदिम–१, फाल्गुनन्द चोकस्थित महासंघको सभाहलमा आयोजित कार्यक्रममा प्रमुख अतिथि, फिदिम नगरपालिकाका प्रमुख ओनाहाङ नेम्बाङले वेभसाइटको उद्घाटन गरेका हुन् ।
महासंघ पाँचथरको अभिलेख, गतिबिधि लगायतका विभिन्न सामाग्री वेभसाइटमा राखिने शाखा अध्यक्ष गिरिराज बाँस्कोटाले बताए ।
सार्वजनिक तथा भेटघाट कार्यक्रममा प्रमुख अतिथि नेम्बाङसँगै प्रमुख जिल्ला अधिकारी पुन्यप्रसाद ढकाल, महासंघ, १ नं. प्रदेश समिति उपाध्यक्ष लवदेव ढुंगाना, प्रहरी नायव उपरिक्षक दानबहादुर थापा, सशस्त्र प्रहरी नायव उपरिक्षक किशोरकुमार श्रेष्ठ, शाखा पूर्व अध्यक्ष लेखनाथ खतिवडा र लक्ष्मी गौतमले शुभकामना मन्तब्य राखेका थिए ।
८३ पत्रकारको सामुहिक दुर्घटना बिमा
सोहि कार्यक्रममा नेपाल पत्रकार महासंघ, पाँचथर शाखामा आबद्ध ८३ जना पत्रकारको सामुहिक दुर्घटना बिमा गरिएको जानकारी दिइएको छ । प्रदेश–१, का पूर्व आर्थिक मामिला तथा योजनामन्त्री इन्द्रबहादुर आङ्बोको सहयोगमा शाखाका ८३ जना साधारण सदस्यको ७ लाख रुपैंयाँ बराबरको सामूहिक दुर्घटना बिमा गरिएको अध्यक्ष बाँस्कोटाले बताए । शाखाले काठमाण्डौंको अडोज इन्स्योरेन्ससँग बिमा सम्झौता गरेको जनाएको छ ।
आगामी दुई बर्ष ‘तालिम बर्ष’
वेभसाइट उद्घाटन समारोहकै अवसरमा नेपाल पत्रकार महासंघ, पाँचथर शाखाले आगामी दुई बर्ष ‘तालिम बर्ष’ घोषणा गरेको छ । महासंघले आगामी दुई बर्ष जिल्लाका पत्रकारहरुलाई विभिन्नखाले क्षमता अभिबृद्धि तालिम दिने शाखा सचिव रामचन्द्र तामाङले बताए ।
Related