विराटनगर। निर्वाचन आयोगले प्रदेश १ प्रदेशसभामा प्रतिनिधित्व गर्दै आएका नेकपा एमालेका १० सांसदले दल त्याग गर्दै अर्को पार्टी नेकपा एकीकृत समाजवादी पक्षमा गराएको सनाखतलाई मान्यता दिएको छ ।

आयोगका निर्णय अनुसार उनीहरुले गत भदौं २२ गते नै प्रदेश निर्वाचन कार्यालयमा उपस्थित भएर नयाँ दलमा सनाखत गरेका हुन् ।

राजनीतिक दल सम्बन्धी ऐन, २०७३ (दोस्रो संशोधन अध्यादेश, २०७८) को दफा ३३ को उपदफा २ (क) तथा राजनीतिक दलसम्बन्धी नियमावली, २०७४ (दोस्रो संशोधन २०७८) को नियम ५ र नियम ७ (क) बमोजिम नेकपा एमालेबाट नेकपा एकीकृत समाजवादी पार्टीमा प्रवेश गर्नका लागि निर्वाचन कार्यालयमा सनाखत गरेका ती १० सदस्यका हकमा राजनीतिक दलसम्बन्धी ऐन, २०७३ (दोस्रो संशोधन अध्यादेश, २०७८) को दफा ३३ (२ क) बमोजिम दल त्याग गरेको नमानिने भएको हो ।

आयोगका अनुसार अब प्रदेश नम्बर १ प्रदेशसभामा चौथो दलको रुपमा एकीकृत समाजवादी दलले मान्वयता पाएको छ । एमालेका पाँच प्रत्यक्ष र पाँच समाुनपातिक प्रदेश सदस्यहरुहरुले एकीकृत समाजवादी रोजेका छन् । सदस्यहरु राजन राई, खिनु लङ्वा (लिम्बू), पदम कुमारी गुरुङ, गणेश बहादुर कामवाङ, सुनिताकुमारी चौधरी, सावित्रा कुमारी रेग्मी, सरिता थापा, कृष्णकुमारी राई, उपेन्द्र प्रसाद घिमिरे र राजेन्द्रकुमार राई अब नेकपा एकीकृत समाजवादी पार्टीका सांसदका रुपमा कायम रहने भएका हुन् ।

अब प्रदेश नम्बर १ मा एकपा एमालेको फुटसँगै वर्तमान मुख्यमन्त्री भीम आचार्य अल्पमतमा परेका छन् ।