लिम्बुवानखबर, २५ भदौं । नेपाली काँग्रेसले १४औं महाधिवेशनको कार्यतालिका परिमार्जन गरेको छ । आज एक विज्ञप्ति जारी गर्दै पूर्वनिर्धारित कार्यतालिकाअनुसार केही जिल्लाका वडा अधिवेशनसमेत सम्पन्न हुन नसकेपछि काँग्रेसले महाधिवेशन कार्यतालिका संशोधन गरेको हो ।

नेपाली काँग्रेस निर्वाचन समितिका संयोजक महादेव प्रसाद यादवले आज विज्ञप्ति प्रकाशन गर्दै २० जिल्लाको वडा अधिवेशन नै हुन बाँकी रहेको हुँदा महाधिवेशन कार्यतालिकामा हेरफेर गरिएको उल्लेख गरेका छन् । उनका अनुसार आज डडेलधुरा जिल्लाको वडा अधिवेशन भएसँगै हालसम्म ५७ जिल्लाको मात्रै वडाअधिवेशन सम्पन्न भएको उल्लेख गरेका छन् ।

अब बाँकी २० जिल्लाको अधिवेशन क्रियाशील सदस्यताको विवाद टुंगो लगाएर एकसाथ असोज ५ गते गर्ने निर्णय भएको विज्ञप्तिमा जनाइएको छ । पूर्वनिर्धारित कार्यक्रमअनुसार काँग्रेसले वडा अधिवेशन भदौ १८ देखि २१ गतेभित्रै सक्नुपर्ने थियो ।

यस्तै नयाँ कार्यतालिका अनुसार पालिका अधिवेशन अब असोज ९ गते हुनेछ । यस्तै प्रदेश निर्वाचन असोज १२ गते तथा एक मात्र निर्वाचन क्षेत्र भएको जिल्लाको अधिवेशन असोज १५ गते गरिनेछ । यसैगरी यसअघि जिल्ला अधिवेशन असोज ५ गते गर्ने तय भएको थियो ।

यस्तैगरी एक भन्दा बढी निर्वाचन क्षेत्र भएको जिल्लामा असोज १८ अधिवेशन गरिने भएको छ । यसअघि असोज १० गते गर्ने कार्यतालिका रहेको छ । तर, प्रदेशको अधिवेशन भने कात्तिक १० देखि १२ सम्म गरिने पुरानो कार्यतालिका यथावत गरिएको छ ।

कांग्रेसको १४औं केन्द्रीय महाधिवेशन भने मंसिर ९ देखि १३ सम्म तय भएको विज्ञप्तिमा जनाइएको छ ।