लिम्बुवानखबर, २९ भदौं । आज प्रतिनिधिसभा बैठक दिउँसो १ बजेदेखि बस्ने संघीय संसद सचिवालयले जनाएको छ । संसदको प्रमुख प्रतिपक्षी दल नेकपा एमालेले निरन्तर संसद बैठक अवरोध गरिरहेको अवस्थामा उत्पन्न गतिरोध अन्त्य गर्न सभामुख अग्निप्रसाद सापकोटाले पहल थालेका हुन् ।
सोमबार सभामुख सापकोटाले सर्वदलीय बैठक राखी छलफल अघि बढाएका थिए । उक्त बैठकमा नेकपा एमालेका अध्यक्ष केपी शर्मा ओली अनुपस्थित रहेका थिए ।
एमालेले सभामुखको भूमिकाप्रति विरोध गर्दै आएको छ । सभामुखले कारबाही गरेका सांसदको सूची टाँस नगरेको र पार्टी फुटाउन प्रमुख भूमिका खेलेको आरोप एमालेले सभामुख सापकोटालाई लगाएको छ । संसद बैठकमा एमालेले संसद अवरोध गरिरहेको छ ।
सरकारले एमालेको विरोधको बाबजुद नै गत शुक्रबार प्रतिस्थापन विधेयकबाट बजेट ल्याएको थियो ।
Related