पथरीशनिश्चरे, ३ असोज । प्रेस संगठन नेपाल मोरङको प्रथम जिल्ला भेला आइतबार पथरीमा सम्पन्न भएको छ । संगठनको पथरीशनिश्चरे २ स्थित हरियाली सामुदायिक वन उपभोक्ता समूहको सभाहलमा भेला भएको हो ।

उक्त भेलाले आगामी तीन महिनाभित्र प्रेस संगठन नेपाल मोरङ्गको जिल्ला अधिवेशन सम्पन्न गर्ने गरी ३ सदस्य रहेको अधिवेशन आयोजक समिति गठन गरेको छ ।

पत्रकार अर्जुन आचार्यको संयोजकत्वमा नवीन कर्ण र सरोज बस्नेत सदस्य रहेको अधिवेशन समिति चयन गरेको हो । यस भेलाले ३५ सदस्यीय उक्त जिल्ला भेला आयोजक समिति पनि गठन गरेको थियो ।

कार्यक्रमका प्रमुख अतिथि समेत रहेका राष्ट्रिय सभाका सदस्य समेत रहेका नेकपा(माओवादी) केन्द्रका नेता गोपी बहादुर अछामीले जनताको आर्थिक तथा सामाजिक अवस्था रुपान्तरण गर्नु नेकपा माओवादीको मुल लक्ष्य रहेको भन्दै जनक्रान्तिको विरुद्धका जुनसुकै राजनैतिक गतिविधिका विपक्षमा सशक्त रूपमा कलम चलाउन संचारकर्मीहरुलाई आग्रह गरेका थिए ।

अझै पनि प्रतिक्रान्तिका अवशेषहरु रहेको भन्दै पार्टीले लिएको कार्य दिशालाई अगाडि बढाउदै लैजान समेत नेता अछामीले निर्देश गरेका छन् ।

मोरङ जिल्लाका जम्मा ६ वटै निर्वाचन क्षेत्रभित्रका १७ वटै स्थानीय तहहरूमा माओवादी जनयुद्को भावना र मर्मलाई आत्मसात् गर्न र मुलुकको आमुल परिवर्तन गर्नका लागि सञ्चार जगतमा श्रमजीवी पत्रकारहरु सशक्त रूपमा लाग्नुपर्ने औंल्याईएको थिए ।

उक्त भेलामा संविधान सभाका सदस्यदय लाल बहादुर मगर तथा दिनानाथ तिम्सिना, प्रदेश नं १ का सासंद कुशल लिम्बू, प्रेस संगठन नेपाल मोरङ संयोजक गणेश उप्रेती, पत्रकार महासंघ प्रदेश १ का महासचिव तथा तथा प्रदेश नं १ का संयोजक विवेक गौतम लगायतको उपस्थिति रहेको थियो ।