लिम्बुवानखबर, ७ असोज । माधवकुमार नेपाल नेतृत्वको नेकपा (एकीकृत समाजवादी) पार्टीले पदाधिकारीको नाम टुङ्गो लगाएको छ । अध्यक्षको प्रस्तावमा केही हेरफेर हुँदै १८ सदस्यीय पदाधिकारी टुंगो लागेको हो ।

कार्य विभाजनमा अध्यक्ष माधवकुमार नेपालपछि झलनाथ खनाल बरिष्ठ नेता छन् भने उपाध्यक्षहरुभन्दा माथि मुकुन्द न्यौपानेलाई नेताको रुपमा तेस्रो वरियतामा राखिएको एकीकृत समाजवादी पार्टी स्रोतले जनाएको छ ।

स्रोतका अनुसार उपाध्यक्षमा ७ जना, महासचिव १, उपमहासचिव ३, सचिव ४ जना गरि १८ सदस्यीय पदाधिकारी चयन भएका छन् ।

अध्यक्ष माधव नेपाल, बरिष्ठ नेता झलनाथ खनाल, नेता मुकुन्द न्यौपाने, उपाध्यक्षहरुमा राजेन्द्र पाण्डे, प्रमेश हमाल, धर्मनाथ साह, जयन्ती राई, घनेन्द्र बस्नेत, केदार न्यौपाने र केशवलाल श्रेष्ठ चयन भएका छन् । त्यसैगरी महासचिवमा बेदुराम भुसाल चयन भएका छन् ।

उपमहासचिवहरुमा प्रकाश ज्वाला, गंगालाल तुलाधार र विजय पौडेल चयन भएका छन् । त्यसैगरी सचिवहरुमा जगन्नाथ खतिवडा, राजेन्द्रकुमार राई, नागेन्द्र चौधरी र रामकुमारी झाँक्री चयन भएका छन् ।

केही प्राविधिक त्रुटि हुनेभएपछि केही नेताहरुलाई पदाधिकारीमा व्यवस्थापन गरिएको पार्टी स्रोतले बताएको छ ।

त्यसैगरी एकीकृत समाजवादीले ३५ सदस्यीय स्थायी कमिटी गठन गरेको छ । त्यस्तै ७१ सदस्यीय पोलिटब्युरो र पूर्ण र वैकल्पिक गरी ३०१ सदस्यीय केन्द्रीय समिति गठन गरिएको छ ।