दमक/ ईसाई समाज दमकले दमकमा आयोजना गरेको प्रदेशस्तरीय अन्तर ईसाई समाज फुटसल प्रतियोगिताको उपाधि मिक्लाजुङ इसाई समाज पाँचथरले जितेको छ ।

शुक्रबार सम्पन्न दोस्रो संस्करणको सो फुटसल प्रतियोगिताको फाइनलमा धरान इसाई समाजलाई पेनाल्टीमा हराउँदै मिक्लाजुङले उपाधि जितेको हो । उपाधिसँगै विजेता टिमले नगद ३० हजार रुपैयाँ हात पारेको छ । उपविजेता धरानले २० हजारमा चित्त बुझाएको छ ।

फ्रेण्डसिप, सम्बन्ध र संगति खेलको मुख्य नारा रहेको सो प्रतियोगिताको उत्कृष्ट गोल रक्षक सुजन बर्देबा, सर्वाधिक गोलकर्ता सनिल राई, र उत्कृष्ट खेलाडी सुमन राईलाई ट्रफी प्रदान गरिएको छ । खेलको समापन अघि दमक ईसाई समाजका पास्टर तथा पत्रकारहरुको मैत्रीपूर्ण खेल भएको थियो ।

दमक ५ स्थित बिस्ट फुटसल खेलमैदानमा भएको प्रतियोगिताको फाइनलमा कडा प्रतिस्पर्धात्मक खेल भएको थियो । प्रतियोगितामा विभिन्न जिल्लाबाट १२ समूहले भाग लिएका थिए ।

प्रतियोगिताको उदघाटन दमक नगर प्रमुख राम कुमार थापाको प्रमुख आतिथ्य तथा कार्यक्रम संयोजक एल्डर शिखर राईको अध्यक्षतामा भएको थियो ।

उदघाटनमा दमक वडा नं. ५ का वडाध्यक्ष इन्द्रबहादुर गुरुङ, इसाई समाजका अध्यक्ष हेमन्त सुब्बा, सचिव अजय पाठक, समाजका सल्लाहकार राजकुमार राई, निवर्तमान अध्यक्ष आकाश थुलुङ लगायतको उपस्थिती थियो ।