ललितपुर, ६ भदौं । झापा विर्तामोडका मेडिकल व्यसायी दुर्गा प्रसाई आइतबार अपराह्न पक्राउ गरेको छ । भक्तपुरस्थित आफ्नै घरबाट प्रसाईंलाई प्रहरीले नियन्त्रणमा लिएको हो ।

‘राष्ट्र, राष्ट्रियता, धर्म संस्कृति र नागरिक बचाउ महाअभियान’ का संयोजक प्रसाईमाथि विभिन्न व्यक्तिहरूलाई आरोपित गरेर आपत्तिजनक अभिव्यक्ति दिने गरेको उजुरी परेपछि सोही उजुरीका आधारमा उनलाई प्रहरीले पक्राउ गरेको हो ।

काठमाडौं जिल्ला अदालतले गत बुधबार प्रसाईंसहित जीवन पाण्डे र प्रकाशचन्द्र दाहालविरूद्ध पक्राउ पुर्जी जारी भएको थियो । आफूविरूद्ध पक्राउ पुर्जी जारी भएपछि प्रसाईंले त्यसको विरोध गर्दै खारेज हुनुपर्ने विभिन्न संचारमाध्यमहरु मार्फत बताइरहेका थिए ।

प्रसाईको समर्थकले शनिबार साँझ देशको विभिन्न स्थानहरुमा मशाल जुलुससमेत निकालेका थिए । आइतबार दिउँसो भक्तपुरस्थित प्रसाईंको घरमा साइबर ब्युरोका प्रहरीहरू पुगेका थिए । त्यसबेला उनले गेट खोल्न मानेका थिएनन् । भ¥याङ लगाएर प्रहरी घरभित्र प्रवेश गरी प्रसाईंलाई नियन्त्रणमा लिनुपरेको प्रहरी स्रोतले जानकारी दिएको छ ।

पक्राउ गरेर साइबर ब्युरो ल्याइसकेपछि प्रसाईंले प्रधानमन्त्री केपी शर्मा ओलीविरूद्ध आफू शरीरमा एक थोपा रगत रहुन्जेल लडिराख्ने अभिव्यक्ति दिएका थिए । प्रसाईंविरूद्ध साइबर ब्युरोमा व्यक्तिको चरित्र हत्या गरेकोलगायत उजुरी परेपछि प्रहरीले उनलाई आवश्यक अनुसन्धानका लागि पक्राउ गरेको जनाएको छ ।

साइबर ब्युरोको टोलीले भक्तपुरस्थित निवासबाट प्रसाईंलाई पक्राउ गरेको ब्युरोका डिआइजी नवीन्द अर्यालले बताए । प्रसाईंविरूद्ध विद्युतीय कारोबार ऐन अनुसारको जाहेरी परेकोले सोहीअनुसार अब अनुसन्धान अघि बढ्ने उनले बताए । ब्युरोले प्रसाईंलाई यसअघि पनि आपत्तिजनक अभिव्यक्ति नदिन पटकपटक सचेत गराउँदै आएको जनाएको छ ।

साइबर ब्यूरोबाट खटिएको टोलीले जिल्ला प्रहरी परिसर भक्तपुरको सहयोगमा प्रसाईंलाई पक्राउ गरेको हो । साइबर ब्यूरोमा उनीविरुद्ध जाहेरी परेपछि जिल्ला अदालत, काठमाडौंले प्रसाईंलाई पक्राउ गरेर अनुसन्धान गर्न प्रहरीलाई अनुमति दिएको थियो ।