ललितपुर, १२ असोज । बिहीबारदेखिको अविरल वर्षाले देशको विभिन्न स्थानमा आएको बाढी, पहिरो र डुबानमा परेर आज साँझसम्म ६६ जनाको मृत्यु भएको छ । सशस्त्र प्रहरी बल नेपाल प्रधान कार्यालयले दिएको जानकारी अनुसार साँझ ५ बजेसम्ममा देशभर गरेर ६६ जनाको मृत्यु भएको, ३५ जना घाइते र अन्य ७९ जना बेपत्ता भएको जनाएको छ ।

शसस्त्र प्रहरीका नायब महानिरीक्षक कुमार न्यौपानेका अनुसार काठमाडौं उपत्यकामा मात्र ३४ जनाको मृत्यु भएको छ । काठमाडौंमा ११, ललितपुरमा १८ र भक्तपुरमा ५ जनाको मृत्यु भएको छ ।

यसैगरी पाँचथरमा ५, धनकुटामा २, सोलुखुम्बुमा २, सुनसरीमा १, काभ्रेमा १४, धादिङमा १, सिन्धुपाल्चोकमा ४ र दोलखामा ३ जनाको मृत्यु भएको छ । मृत्यु हुनेको संख्या अझै थप हुन सक्ने जनाइएको छ ।

यसैगरी बेपत्ता हुनेहरुमा ललितपुरमा १५, काभ्रेमा २६, काठमाडौँमा ६, मकवानपुरमा ७, दोलखामा ३, झापामा ४, पाँचथरमा ५, सिन्धुपाल्चोकमा ५ जना तथा अन्य जिल्लासहित गरेर ७९ जना रहेको शसस्त्र प्रहरीले जनाएको छ ।

नेपाल प्रहरीका अनुसार सुरक्षा निकाय तथा उद्धारमा संलग्न सङ्घसंस्थाको सहकार्यमा अहिले पनि उद्धार जारी रहेको सहप्रवक्ता प्रहरी वरिष्ठ उपरीक्षक विश्व अधिकारीले जानकारी दिए । उनका अनुसार नेपाल प्रहरीबाट १० हजार बढी र सशस्त्र प्रहरीबाट पनि सोही हाराहारीमा सुरक्षाकर्मी उद्धारमा परिचालन गरिएको छ । अझै निरन्तर उद्धार कार्यमा प्रहरी परिचालन गरिएको जनाइएको छ ।