ललितपुर, १३ असोज । शुक्रबार देखि तीन दिनसम्म परेको अविरल वर्षासँगै आएको बाढी र पहिरोमा परी मृत्यु हुनेको संख्या १७० पुगेको छ । गृहमन्त्रालयका अनुसार ४३ जना अझै बेपत्ता छन् ।काठमाडौंको नागढुंगा नजिकै झाप्ले खोलामा गएको पहिरोमा पुरिएर बस तथा हाइस सवार ३५ जनाको मृत्यु भएको गृहमन्त्रालयले जनाएको छ ।

अविरल परेको पानीका कारण बाढी तथा पहिरोमा परेर एक सय ११ जना घाइते भएका छन् । घाइतेहरुको सरकारले निःशुल्क उपचार भइरहेको जनाएको छ ।

करिव ४ हजार विपत प्रभावितलाई उद्दार गरिएको गृहमन्त्रायलले जनाएको छ । आइतबार मात्र काभ्रेपलाञ्चोक, सिन्धुली र ललितपुर लगायतका जिल्लाबाट घाइते र अलपत्र गरी १६२ जनाको नेपाली सेनाको हेलिकप्टरबाट उद्धार गरिएको मन्त्रालयले जनाएको छ ।

बाढी पहिरो प्रभावितलाई खाद्यन्न लगायत आपतकालीन राहत सामग्री उपलब्ध गराइएको जनाइएको छ । साथै खोज तथा उद्धार र राहत कार्यलाई उच्च प्राथमिकताका साथ निरन्तरता दिने सरकारले जनाएको छ ।

सरकारले सम्बन्धित निकायसँगको समन्वयमा अवरुद्ध सडकहरुलाई तत्काल सञ्चालनमा ल्याउन मन्त्रालयले पहल गरिरहेको गृहमन्त्रालयले सूचना जारी गरेको जनाएको छ । साथै प्रदेश सरकार, जिल्ला विपद व्यवस्थापन समिति र स्थानीय तह मार्फत बनेको समितिसमेत सबै निकायहरु खोज, उद्धार र राहतमा सक्रियतापूर्वक जुटिरहेको समेत जनाएको छ ।