दमक, २९ भदाैं । कमल गाउँपालिकाका अध्यक्ष हुकुमसिंह राईले पालिकाको विकास निर्माणलाई नकारात्मक दृष्टिकोणले मात्र हेर्ने प्रवृत्ति त्याग्न आग्रह गर्नुभएको छ। आलोचना, रचनात्मक सुझाव र कामको सही मूल्यांकन फरक विषय भएको उल्लेख गर्दै उहाँले बोल्नु र व्यावहारिक रूपमा काम गर्नु बिल्कुलै फरक हुने बताउनुभयो।

गाउँपालिकाको नयाँ प्रशासनिक भवन निर्माणका विषयमा उठिरहेका प्रश्नहरूतर्फ लक्षित गर्दै अध्यक्ष राईले कसैको प्रयास नदेखी दोष मात्र खोज्ने र भ्रम फैलाउने कामले समाज र देश कसैको पनि हित नगर्ने स्पष्ट पार्नुभयो।

नयाँ भवन निर्माणको औचित्य पुष्टि गर्दै उहाँले भन्नुभयो, “हाल गाउँपालिकाको सेवा साना-साना पाँचवटा छुट्टाछुट्टै खण्डबाट सञ्चालन भइरहेको छ भने बर्खामा पानी चुहिने समस्या छ। नागरिकलाई एउटै छानामुनिबाट चुस्त, दुरुस्त र प्रभावकारी सेवा प्रवाह गरी सुशासनको अनुभूति दिलाउन नयाँ भवन निर्माणलाई प्राथमिकता दिइएको हो।”

अध्यक्ष राईका अनुसार आवश्यक मापदण्ड पूरा भए कमल गाउँपालिका नगरपालिका बन्नेछ, अन्यथा गाउँपालिकाकै रूपमा अघि बढ्ने निर्णय भइसकेको छ। यो प्रशासनिक भवन कुनै व्यक्ति वा वर्तमान नेतृत्वका लागि मात्र नभई दीर्घकालसम्मका लागि उपयोगी हुने उहाँको भनाइ छ।

“पात्र र नेतृत्व परिवर्तन हुन सक्छन्, तर पालिकाको प्रशासनिक भवन फेरिँदैन। यो कमल गाउँपालिकाका नागरिकको सधैँका लागि साझा सम्पत्ति हो,” उहाँले थप्नुभयो।

यस्तै, अध्यक्ष राईले वर्तमान तथा विगतका नेतृत्वले भौतिक पूर्वाधार, शिक्षा, स्वास्थ्य, कृषि, पशुपालन, महिला तथा बालबालिका लगायतका क्षेत्रमा गरेका कामबारे तथ्य र परिणामका आधारमा खुल्ला छलफल गर्न आफू सदैव तयार रहेको बताउनुभयो। नागरिकका सकारात्मक सल्लाह, सुझाव र रचनात्मक आलोचनालाई ग्रहण गर्दै अघि बढ्ने प्रतिबद्धता पनि उहाँले व्यक्त गर्नुभएको छ।