दमक, १४ असोज। झापाको दमक अस्पतालले निकट भविष्यमै डायलासिस तथा सिटी स्क्यान सेवा सञ्चालनमा ल्याउने भएको छ। स्वास्थ्य सेवालाई थप व्यवस्थित र प्रभावकारी बनाउन अस्पतालले आफ्नो भौतिक पूर्वाधार विस्तार गर्दै थप एक तला भवन निर्माण गरिरहेको छ।

उक्त नयाँ पूर्वाधार निर्माण सम्पन्न भएसँगै आउँदा केही महिनाभित्रै ती सेवाहरू सञ्चालनमा आउनेछन्।

दमक नगरपालिकाका प्रमुख तथा अस्पतालका अध्यक्ष राम थापाका अनुसार अस्पतालमा उपचारका लागि आउने बिरामी तथा सेवाग्राहीलाई सहज र गुणस्तरीय सेवा पुर्‍याउने उद्देश्यले पूर्वाधार विस्तारको काम तीव्र पारिएको हो।

निर्माण भइरहेको नयाँ तलामा बिरामीका कुरुवाहरूका लागि आरामदायी र सामान सुरक्षित राख्न सकिने सुविधासम्पन्न विश्राम कक्षसमेत तयार पारिँदै छ। यसैगरी, सोही तलामा अस्पतालको आफ्नै व्यवस्थित फार्मेसी सञ्चालन गर्ने तयारी भइरहेको नगर प्रमुख थापाले जानकारी दिए।

स्थानीयस्तरमै डायलासिस र सिटी स्क्यानजस्ता जटिल तथा अत्यावश्यक सेवा उपलब्ध हुने भएपछि दमक र आसपासका बासिन्दालाई उपचारका लागि अन्यत्र जानुपर्ने बाध्यता हट्ने विश्वास लिइएको छ।