लेटाङ, १५ असोज । संघीय लिम्बुवान मञ्च, नेपाल मोरङ् जिल्ला अध्यक्ष दिलु लिङदेनले शनिबार हुन गईरहेको पाँचौं जिल्ला अधिवेशनको सम्पूर्ण तयारी पुरा भएको बताएकी छन् । शनिबार आयोजना हुने पाँचौ अधिवेशनलाई मञ्चका संघीय अध्यक्ष कुमार लिङदेन मिराकद्वारा खुल्लासत्र उद्घाटन हुने अध्यक्ष दिलुले बताइन् ।

जिल्लाको १७ वटा स्थानीय पालिका, ६ वटा निर्वाचन क्षेत्र र १२ वटा प्रदेश निर्वाचन क्षेत्रबाट कोभिड १९को अवस्थालाई मध्यनजर गर्दै कम्तिमा १ हजार कार्यकर्ताहरु खुल्ला सत्रमा सहभागी हुने बताईएको छ । त्यसैगरी खुल्लासत्र सकिन्नसाथ बन्दसत्रमा २ सय पचास प्रतिनिधि र १ सय पर्यवेक्षकहरुबाट नयाँ समिति चयन गर्ने अध्यक्ष दिलुले बताइन् ।

लेटाङको गोदावारी सामुदायिक बनको सभाहलमा हुने कार्यक्रममा विभिन्न जातीय झाँकी सहित सांगीतिक कार्यक्रमहरु पनि आयोजना हुने जिल्ला बरिष्ठ उपाध्यक्ष जीवन खेवाले बताए । त्यसैगरी मोरङ् जिल्लामा मञ्चलाई शसक्त पार्टीको रुपमा स्थापना गर्दै आगामी स्थानीय पालिका, प्रदेश र संघको चुनावमा नेकपा एमाले, कांग्रेस, माओवादी पार्टीसँग प्रतिस्पर्धा गर्नेगरी अघि बढेको मोरङ् जिल्ला इन्चार्ज प्रान्तीय उपमहासचिव तथा संचारविभाग प्रमुख दिल कुमार लावतीले बताए ।