माङसेबुङ, लिम्बुवानखबर/किरात साम्यो साक्थिम्गेन मुजोत्लुङ पान्जुम्भो अध्यक्षमा ज्ञानु केदेम निर्वाचित भएका छन् । पान्जुम्भोको ४२ औं स्थापना दिवस तथा छैठौं केन्द्रीय सम्मेलनबाट केदेम अध्यक्षमा निर्वाचित भएका हुन् ।

किरात धार्मिक पर्यटकीय तिर्थस्थल इलामको माङसेबुङमा असोज २३ देखि चार दिनसम्म चलेको छैठौं सम्मेलनबाट केदेमको अध्यक्षतामा २६ सदस्यीय नयाँ कार्यसमिति निर्वाचित गरेको हो ।

नवगठित पान्जुम्भोको उपाध्यक्षमा क्रमशः लेखनाथ चेम्जोङ, आइन्द्र थेगिम, चन्दा कुरुम्बाङ, सुमिला योङहाङ, अर्जुन सम्बाहाङफे निर्वाचित भएका छन् । यस्तैगरी सचिवमा सुवास गुरुङ, सह–सचिवमा अनिल चेम्जोङ, मिशन सेलिङ, कोषाध्यक्षमा मनप्रसाद चेम्जोङ र सह–कोषाध्यक्षमा चतुरमान साम्पाङ, प्रमिला कुरुम्बाङ सर्वसम्मत निर्वाचित भएका छन् ।

यसैगरी सदस्यहरुमा बीरपन थेगिम, तारा केरुङ, अनिस लाओती, रमेश सिगु, दिलहाङ सम्बाहाङफे, आइन्द्र नेम्बाङ, दिलिप माखिम, तान्छोहाङ फियाक, लाबुनहाङ केरुङ, रमला साँबा, विपना तबेबुङ, नुमा आङदेम्बे, लक्ष्मी थेगिम, उमा सम्बाहाङफे निर्वाचित भएका छन् ।

किरात चोत्लुङ मुहिङगुम अङसीमाङगेन्ना सेवा समितिका केन्द्रीय अध्यक्ष केहेरसिं योङहाङले नव निर्वाचित कार्यसमितिलाई नीति निर्देशन सहित शुभकामना दिएका छन् । पान्जुम्भोका निवर्तमान अध्यक्ष रामबहादुर थुलुङ लगायतले साक्थिम्गेन पान्जुम्भोका नवनिर्वाचित पदाधिकारी तथा सदस्यहरुलाई बधाई तथा शुभकामना मन्तव्य राखेको थिए ।

यस्तै कार्यक्रममा प्रतिबद्धता मन्तव्य राख्दै नव निर्वाचित अध्यक्ष ज्ञानु केदेमले पान्जुम्भोलाई थप मजबुद्ध, शसक्त र क्रियासिल बनाउने प्रतिबद्धता मन्तव्य राखेको थिए ।

किरात चोत्लुङ मुहिङगुम अङसीमाङगेन्ना सेवा समितिका महासचिव काकीराम लाओतीको संयोजकत्वमा किरात धर्म तथा साहित्य उत्थान संघका केन्द्रीय सह–सचिव आङबुहाङ अवोध अविरल, माङगेन्ना सेवा समितिका सदस्य पूर्णकार्की ढोली, किरात साम्यो नालीफूङवा मुजोत्लुङ पान्जुम्भोका पूर्व सदस्य सुनिल सेर्मा, किरात साम्जीक मुन्धुम निसामहिमका तुम सिक्साम्बा ललितचन्द्र फियाक रहेको पाँच सदस्यीय निर्वाचन मण्डलले पान्जुम्भोको नयाँ कार्यसमिति सर्वसम्मत निर्वाचित गरेको हो ।

पान्जुम्भोद्वारा १० बुँदे माङसेबुङ घोषणा पत्र जारी

किरात साम्यो साक्थिम्गेन मुजोत्लुङ पान्जुम्भोले पहिलो पटक सम्मेलन मार्फत पान्जुम्भोको कार्य नीति पारित गरेको छ । पान्जुम्भोले १० बुँदे माङसेबुङ घोषणा पत्र जारी गरेको हो ।

मुहिङगुम अङसीमाङ लिङदेन फाल्गुनन्दको माङसिवाखाहुन र किरात धर्म दर्शनलाई अक्षरस पालना गर्दै वर्तमान धर्मगुरु आत्मानन्द लिङदेन तथा गुरुआमा पवित्रहाङमा साँवा लिङदेनहरुद्धारा सृजना गरिएका गीत संगीतहरुको संरक्षण गर्न र किरात मौलिक संस्कार संस्कृतिहरुलाई संरक्षण गर्दै विश्वव्यापी प्रचार–प्रसार गर्ने उद्देश्यले वि.स. २०३७ साल असोज २५ गते केन्द्रीय किरात सांस्कृतिक समितिको स्थापना भएको थियो ।

किरात धर्म सम्बद्ध सांस्कृतिक समितिले स्थापना यता निरन्तर किरात धार्मिक जागरणका सन्देशमूलक कार्यक्रमहरु सञ्चालन गर्दै आईरहेको छ । यसरी अघि बढ्दै आउनेक्रममा २०५८ सालमा संस्थाको नाम परिवर्तन गरी ‘किरात साम्यो साक्थिम्गेन यक्पाङगेन पान्जुम्भो’ (किरात धर्म सांस्कृतिक राष्ट्रिय समिति) बनाइएको अङ्सीमाङगेन्ना सेवा समितिका महासचिव काकीराम लावतीले वताए ।

हेर्नुहोस्ः घोषणापत्र