दमक, ३१ असोज । राष्ट्रिय कमेडी च्याम्पियन भरतमणी पौडेल दमकमा अभिनन्दित भएका छन् । भर्खरै सम्पन्न कमेडी च्याम्पियन रियालिटी शोमा सर्वोत्कृष्ट प्रस्तुति दिएर उपाधि जित्न सफल ताप्लेजुङका स्थायी बासिन्दा पौडेललाई दमकमा रहेको पौडेल युवा मञ्च दमक नगर समिति र निस्कर्स न्युजले अभिनन्दन गरेको हो ।

शनिवार कमल ५ स्थित आँखीझ्याल रेस्टुरेन्टको सभाकक्षमा एक कार्यक्रम गरि भरतमणीलाई अभिनन्दन गरेका हुन । युवा मन्चका अध्यक्ष थरेन पौडेलको अध्यक्षता र सल्लाहकार संयोजक राम पौडेल र दमकका युवा ब्यवसायी तथा लायन लिडर ज्ञाननाथ पौडेलको विशेष आतिथ्यमा भएको कार्यक्रममा उनलाई बधाई ज्ञापन गर्दै अभिनन्दन पत्र हस्तान्तरण गरिएको थियो ।

सो अवसरमा कमेडी च्याम्पियन पौडेलले सबैको साथ ,सहयोग र हौसलाका कारण आफुले उपाधि जित्न सफल भएको भन्दै धन्यवाद व्यक्त गरे । उनले आफ्नो प्रतिभालाई निरन्तर अगाडी बढाएर कलाकारितालाई ब्यवसायिकताको बाटोमा अघि बढाउने प्रतिबद्धता जनाए ।

भर्खरै सम्पन्न रियालिटी सोमा उपाधि जित्दै पौडेलले नगद २५ लाख र कार हात पारेपछि सामान्य परिवारमा पनि बिशिष्ट प्रतिभाको सम्भावना हुन सक्ने उदाहरणका रुपमा लिइएको छ ।