जनता समाजवादी पार्टी नेपाल (जसपा)ले पार्टीको आधिकारिक निर्णय विपरित स्वतन्त्र उम्मेद्वारी दिएका पार्टीका नेता कार्यकताहरुलाई निष्काशन गरेको छ ।

बिहीबार जसपा केन्द्रीय कार्यालयले विज्ञप्ति जारी गरेरै पार्टी अनुशासन उल्लंघन गरी उम्मेद्वारी कायम राखेको भन्दै स्वतन्त्र उम्मेद्वारी दिएका पार्टीका नेता कार्यकर्तालाई निष्काशन गरेको जानारी दिएको हो ।

जसपाले पार्टी निर्देशन विपरित उम्मेद्वार बनेका कसैको पक्षमा मत नमाग्न र प्रचार प्रसार नगर्न पनि आफ्ना नेता कार्यकर्तालाई निर्देशनसमेत दिएको छ ।

जारी विज्ञप्तिमा भनिएको छ –‘पार्टी निर्देशन विपरित पार्टी सदस्यहरुले उम्मेद्वारी कायम राखी रहेका र पार्टीलाई असर पार्ने तथा पार्टी हित विपरित कार्य गरिरहेको हुँदा त्यस्ता उम्मेद्वारहरुो पक्षमा प्रचार प्रसार नगर्न र नलाग्न पनि सम्पूर्ण पार्टी पंक्तिलाई निर्देश गरिन्छ ।’

तालमेल भएका स्थानमा जसपा, नेपाल र नेकपा (एमाले)का संयुक्त उम्मेद्वारहरुलाई र तालमेल नभएका स्थानमा जसपा, नेपालका उम्मेद्वारको पक्षमा लाग्न, प्रचार प्रसार गर्न, मत माग्न र निर्वाचनमा विजयी बनाउन जसपा केन्द्रीय कार्यालयले निर्देशन जारी गरेको हो ।