दमक, १९ असाेज ।  दुइ दिनदेखिकाे परेकाे भीषण वर्षाले निम्त्याएको पहिरोले प्रदेश १ काे इलाम जिल्लामा ठूलो मानवीय क्षति भएको छ।

आइतबार विहानसम्मकाे विवरण अनुसार पहिरोले कम्तीमा २८ जनाको ज्यान लिइसकेकाे प्रहरीले जनाएको छ।

प्रदेश १ का प्रदेश प्रहरी प्रवक्ता एसएसपी दीपक पोखरेलले दिएको जानकारी अनुसार जिल्लाका विभिन्न स्थानमा खसेको पहिरोले कम्तीमा १८ जनाको ज्यान गएको हाे ।

‘विभिन्न पालिकाहरूकाे  ६ स्थान  पहिरो जाँदा कम्तिमा २८ जनाको मृत्यु भएको पुष्टि भएको छ,’ एसएसपी पोखरेलले बताए ।

प्राप्त जानकारी अनुसार इलामका सुर्योदय, देउमाई, माङसेवुङ, फाकफोकथुम, माइजाेगमाइ र इलाम नगरपालिकामा पहिरोका कारण ठूलो जनधनको क्षति भएको स्थानीय प्रशासनले जनाएको छ।

सुर्योदय नगरपालिका–५ मानेभञ्ज्याङमा खसेको पहिरोमा ५ जनाको मृत्यु भएको छ ।  त्यस्तै, माङसेवुङ गाउँपालिका–१ पाटीगाउँमा ३ जना, देउमाई नगरपालिका–५ धारेमा २ जना र सोही नगरपालिकाको धुसुनेमा २ जनाको मृत्यु भएको पुष्टि भएकाे छ।

यस्तै, फाकफोकथुम गाउँपालिका–३ स्थित रातमाटेमा १ जनाको मृत्यु भएको छ भने इलाम नगरपालिका–५ घोसगाउँमा ६ जना, माइजाेगमाइमा ८ को ज्यान गएको प्रहरीले पुष्टि गरेको छ।

जिल्ला प्रहरी कार्यालय इलामका अनुसार अहिले पनि केही स्थानमा पहिरो खसेको खबर आइरहेको छ। उद्धार तथा राहत कार्यमा सशस्त्र प्रहरी, नेपाल प्रहरी र स्थानीय बासिन्दा खटिएकाे बताइएकाे छ ।

लगातारको वर्षाका कारण इलाम जिल्लाका अधिकांश ग्रामीण सडक अवरुद्ध छन् र जोखिम क्षेत्रका बासिन्दालाई सतर्कता अपनाउन प्रशासनले आग्रह गरेको छ।

पहिरोमा परेर बेपत्ता संख्या बढन सक्ने प्रहरीको अनुमान रहेकाे छ। बाढीपहिराेका कारण कति घाइते र क्षति भयाे त्यसकाे विवरण भने संकलन भइ नसकेकाे प्रशासनले जनाएकाे छ ।