दमक, असोज १६ — झापाको दमकमा जारी ‘कोशी प्रदेश जिल्लास्तरीय प्रथम दमक भेट्रान च्यालेन्ज कप-२०८३’ अन्तर्गत दोस्रो दिनको पहिलो खेलमा चन्द्रगढी भेट्रान क्लब, झापाले एकतर्फी प्रदर्शन गर्दै विजयी यात्रा सुरु गरेको छ। दमक २ स्थित बेलडाँगी खेलमैदानमा शुक्रबार सम्पन्न खेलमा चन्द्रगढीले मिक्लाजुङ भेट्रान क्लब पाँचथरलाई ५–० को फराकिलो गोल अन्तरले पराजित गर्दै क्वाटरफाइनलको यात्रा पक्का गरेको हो।

दमक भेट्रान फुटबल क्लबको आयोजनामा सञ्चालित प्रतियोगिताको दोस्रो दिन चन्द्रगढीको आक्रमक खेल सामु मिक्लाजुङ निरुपाय बनेको थियो।

पहिलो हाफमा अग्रता, दोस्रो हाफमा गोलको वर्षा

प्रतिस्पर्धात्मक बनेको पहिलो हाफको अन्तिम मिनेटमा चन्द्रगढीका कप्तान प्रेम लिम्बूले उत्कृष्ट गोल गर्दै टोलीलाई सुरुआती अग्रता दिलाएका थिए। पहिलो हाफ १-० मा सकिए पनि दोस्रो हाफमा चन्द्रगढी थप आक्रामक रणनीतिसाथ मैदान उत्रियो।

दोस्रो हाफको सुरुवातदेखि नै दबाब बनाएको चन्द्रगढीका लागि: ६ औँ मिनेटमा: मित्र बसन्तले दोस्रो गोल गरे। ११ औँ मिनेटमा युगल किशोर राईले तेस्रो गोल थपे। १६ औँ मिनेटमा सुवास खड्काले टोलीका लागि चौथो गोल दर्ता गरे। त्यसैगरी १८ औँ मिनेटमा कप्तान प्रेम लिम्बूले व्यक्तिगत दोस्रो गोल गर्दै टोलीको ५–० को फराकिलो र सानदार जित सुनिश्चित गरे।

प्रतियोगिता अन्तर्गत शनिबार दुई वटा क्वाटरफाइनल खेलहरू हुने छ । पहिलो क्वाटरफाइनल विर्तामोड भेट्रान विरुद्ध आयोजक दमक (निलो) र दोस्रो क्वाटरफाइनल ढल्केजोवन उर्लाबारी विरुद्ध आयोजक दमक (रातो) बिच हुनेछ ।

असोज १५ गतेदेखि सुरु भई असोज २१ गतेसम्म सञ्चालन हुने यस प्रदेशस्तरीय प्रतियोगिताको विजेताले नगद रु. १ लाख १ हजार र उपविजेताले नगद रु. ५१ हजार सहित ट्रफी, मेडल र प्रमाणपत्र प्राप्त गर्ने आयोजकले जनाएकाे छ।