गजल

• लेकाली कान्छा मुक्कुम मादेन

गाउँले छिमेक मिल्दा–मिल्दै विभेद गर्ने सरकार देख्छु ।
मन्दिरमाथि करोड छुट्दा माङहिममाथि हजार देख्छु ।

ब्रम्हाण, क्षेत्री, बैश्य, शुद्र एउटै घरको सदस्य छौं
एउटा नहुँदा नि रेट्ने विरहको धार देख्छु ।

एकजनालाई बिराम पर्दा अर्को हातले दबाइ ख्वाउँछौं
ब्यर्थै माथिबाट यहाँ छुवाछुतको खबरदार देख्छु ।

राष्ट्रझण्डा भन्छन् तर त्यही साझा झण्डामाथि
बहिष्कार छन् कयौं पूmल एउटा फूलको मुहार देख्छु ।

सबै भाषा लिपि धर्म संस्कृतिको सम्मान भन्छन्
सरकारी त्यो काम–काजबाटै कयौं भाषामा बार देख्छु ।

गाउँघर शहर प्रदेशकै न्वारनको नाम हटाएर
अतिक्रमित बिरानो नाम राख्नेकै यो संसार देख्छु ।

बनको देउता भन्दा पनि देशकै देउता प्रतिकुल छ
रत ‘मुक्कुम’ तिम्रो उचाइ उन्नाइसबाट अठार देख्छु ।

ताप्लेजुङ्