दमक। कोरोना भाइरसका कारण विश्वमा लाखौंले ज्यान गुमाइ सकेका छन् । पछिल्लो समय अग्रस्थानमा खटिएर सूचना प्रवाह गर्ने संचारकर्मी समेत संक्रमित हुने क्रम बढ्दो छ ।

झापा जिल्लामा मात्रै आठ पत्रकार कोरोना संक्रमित भएका छन् । जसमध्ये पाँच जनाले कोरोना जितेका छन् । कोरोना जित्ने पत्रकारहरुमा दयाराम दाहाल (सुलभ), भूपाल लुइँटेल, रमेश तिवारी, केशव भट्टराई र जिएन शर्मा रहेका छन् । हाल तीन जना पत्रकार होम आइसोलेसनमा रहेका छन् ।

कोरोना संक्रमण देखिएपछि पत्रकार महासंघ झापाका अध्यक्ष तारामणि सापकोटा, कान्तिपुर टिभीका झापा संवाददाता गणेशमान मुखिया र पाथिभरा एफएमका सचार प्रमुख लोकनाथ रिजाल होम आइसोलेसनमा रहेका छन् । उनीहरुको अवस्था सामान्य रहेको र चिकित्सकसँग परामशं गरिरहेको बताइएको छ । सापकोटा झापाको शिवसताक्षीस्थित मूल घर, मुखिया विर्तामोडस्थित घर र रिजाल मोरङस्थित घरमा रहेका छन् ।

पछिल्लो समय झापा सहित देशभर कोरोनाको संक्रमण दर बढ्दै गएको छ । कोरोना जितेका पत्रकारहरुले आत्मबल बलियो बनाउन र आफ्नो स्वास्थ्यको ख्याल गर्न सबैमा आग्रह गरेका छन् ।

यसै बिच पत्रकार महासंघ झापाका उपाध्यक्ष एकराज गिरीले अग्रस्थानमा खटिने सञ्चारकर्मीलाई स्वास्थ्य सावधानी अपनाउन आग्रह गरेका छन् । उनले संक्रमित पत्रकारहरुको शिघ्र स्वास्थ्य लाभको कामना समेत गरेका छन् । प्रदेश १ मा हालसम्म ७० जना पत्रकार संक्रमित भएको पत्रकार महासंघका प्रदेश अध्यक्ष विक्रम लुइँटेलले जनाएका छन् ।