धरान– भूपू ब्रिटिश गोर्खा सैनिकहरुको हकअधिकार सुनिश्चितता आन्दोलनका प्रमुख अभियन्ता साथै हाल जनता समाजवादी पार्टीका नेता समेत रहेका धरानका सामाजिक व्यक्तित्व गजेन्द्र इस्वोको निधन भएको छ ।

उनको उपचारको क्रममा विराटनगर स्थित न्युरो अस्पतालमा आज विहान निधन भएको हो ।

किरात याक्थुम चुम्लुङको केन्द्रीय सल्लाहकार समेत रहेका इस्वोलाई केही दिन अघि कोरोना सङ्क्रमण देखिएको थियो । उनको आज बिहान ४ बजे उपचारको क्रममा निधन भएको परीवारले जनाएको छ । इस्वो केही बर्षदेखि छालाको क्यान्सरको उपचार गराइरहेका थिए भने उनमा मधुमेहको समेत समस्या रहेको थियो ।

भूपू गोर्खा सैनिकहरुको आन्दोलनको क्रममा ब्रुनाईमा हकअधिकारको आन्दोलन गर्दा ११ जनालाई जागिरबाट हटाइएको थियो, ती मध्येमा इस्वो पनि एक हुन । नेपालमा भएको भूपू गोर्खा सैनिकहरुको आन्दोलनलाई लामो समय गेसो सुनसरीको नेतृत्वमा रहेर इस्वोले नेतृत्व दिएका थिए । विभिन्न सामाजिक संघ संस्थाहरूमा समेत अग्रसर उनी  धरान विश्णुपादुका माछामारामा निर्माण भैरहेकाे गोर्खा पार्कका परिकल्पनाकार समेत हुन् ।

पछिल्लो समयमा पहिचानकाे राजनीतिमा आएका इस्वोले धरान उपमहानगरको उपनिर्वाचनमा समाजवादी पार्टीबाट मेयरको उम्मेदवारी समेत दिएका थिए ।