दमक।  १ नं. प्रदेशमा २३ कात्तिकबाट सार्वजनिक यातायात बन्द गर्ने व्यावसायीले घोषणा गरेका छन् ।

प्रदेश सरकारले व्यवसायीको माग सम्बोधन गर्न चासो नदिएपछि आइतबारदेखि अनिश्चितकालका लागि बन्द गर्ने व्यवसायीहरूले घोषणा गरेका हुन् ।

सार्वजनिक यातायात केन्द्रीय महासंघ, प्रदेश १ का महासचिव रमेश खत्रीले पटक-पटक सरकारसँग आग्रह गर्दा समेत हाम्राे माग सम्बोधन नभएपछि यातायात बन्द गर्ने निर्णय भएको बताए ।

उनका अनुसार व्यवसायीले लकडाउन अवधीको सवारी करमा पूर्ण छुट दिनुपर्ने, बैंकको व्याजमा सहुलियतमा पहल गरि दिनुपर्ने, कात्तिक मसान्तपछि सवारी करमा बिलम्ब शुल्क लाग्ने निर्णय खारेज गर्नुपर्ने लगायत माग प्रदेश सरकारसमक्ष पेस गरेका थिए । तर प्रदेश सरकारले माग सम्बोधन गर्न चासो नदिएको उनले बताए ।

‘सवारी करमा अन्य प्रदेशले छुट दिएका छन् । तर हाम्रोमा छुट दिइएन्’ उनले भने ‘कात्तिक मसान्तपछि बिलम्ब शुल्क लाग्ने भनेपछि आन्दोलनमा जाने निर्णय गरेका छौं ।’

२३ गते आइतबारबाट बस, टेम्पो, सिटी सफारी ढुवानीका साधनलगायत सबै यातायातका साधन अनिश्चितकालका लागि बन्द हुने उनले बताए ।