दमक। समाजवादी पार्टी झापाका अध्यक्ष, पत्रकार महासंघ झापाका पूर्व सचिव साथै दमक राष्ट्रिय बहुमुखी सहकारी संस्थाका संचालक समिति सदस्य एवं युवा नेता दीपेनवाला राईलाई पितृशोक परेको छ । ९९ बर्षको उमेरमा राईका पिता धनवल राईको शनिबार साँझ कमल ६ स्थित नीजि निवासमा नै निधन भएको हो ।

करिब एक शताब्दी उमेरका युग पुरुष तात्कालिन जहानीय राणा शासनको विरुद्धमा लडेका धनबल २००७ सालको क्रान्तिका मुक्ति आन्दोलनका एक योद्धा भएको जानकारहरू बताउँछन् ।

पाँचथरको रानीटारमा जन्मिएका  भारतीय सेनामा भर्ती हुने सपना बोकेर घरबाट निस्किएका उनी अन्ततः राणा शासनको विरुद्ध शसस्त्र आन्दोलनका मुक्ति सेना बनेका थिए । वि.सं. २०१७ सालमा राजा महेन्द्रले कु गरेर पञ्चायती व्यवस्था शुरु गरेपछि १८ सालतिर भारतको दार्जिलिङ् प्रवासिएका स्वर्गिय धनबल राई पुनः नेपालमा बहुदीय क्रान्ति शुरु भएपछि सपरिवार सहित ४१ साल तिर झापाकाे लखनपुर ३ हाल कलम ६ मा आएर स्थायी रुपमा बस्दै अाए थिए ।

लामो समय नेपाली राजनीति क्रान्ति प्रति जानकार राईले नेपालमा अझै क्रान्ति सफल नभएको बताउँदै आएका थिए । शासनहरु परिवर्तन भए तर अनुहार परिवर्तन नभएकोमा चिन्तित शताब्दी पुरुषको अन्त्यले झापाबासीहरुले पहिचान पक्षका एक योद्धा गुमाएको महसुस गरेका छन् ।

मृतक राईको आज दिउँसो आदिवासी रंगशाला पूर्व सावित्रा चौक उत्तरको समाधिस्थलमा धार्मिक परम्परा अनुसार अन्त्येष्टी गरिने पारिवारिक स्रोतले जनाएको छ ।