दमक। झापाको दमकमा कोरोना बिरामीहरुलाई लक्षित गरि कोभिड उपचार केन्द्रको शुभारम्भ भएको छ । लामो समयदेखि उद्घाटनको तयारीमा रहेको केन्द्रको दमक २ बेलडाँगीमा प्रदेशसभा सदस्य अर्जुन राईले आज उद्घाटन गरेका हुन् ।

अब कोरोना पोजेटिभ भएका कम्तिमा पनि ३० जनासम्मलाई यहाँ उपचार गर्न सकिने नगरपालिका उपमेयर तथा दमक अस्पताल संचालक समिति अध्यक्ष गीता अधिकारीले बताएकी छन् । उनले ‘यो अस्पताल दमक अस्पताल मातहत समेत रहने बताए ।’

पछिल्लो समय झापाको दमकमा कोरोना संक्रमण दिनानुदिन बढ्ने क्रम बढेसँगै सुरक्षामा चुनौती थपिएको हुँदा कोभिड नियन्त्रण रोकथाम तथा ब्यवस्थापनमा दमक नगरपालिका लागि परेको दमक नगर प्रमुख रोमनाथ ओलीले बताए । उनले –अब कोभिड उपचार केन्द्र सञ्चालनमा आएको हुँदा नगरपालिकाले यसलाई सुविधा सम्पन्न बनाउदै लैजाने पनि जनाए ।

केन्द्रको उदघाटन समारोहमा जिल्ला समन्वय समिति झापाका प्रमुख सोमनाथ पोर्तेल, झापाका प्रमुख जिल्ला अधिकारी श्रवण कुमार तिम्सिना, जिल्ला प्रहरी कार्यालय झापाका प्रहरी उपरीक्षक कृष्णराज कोईराला, नगरका राजनीति दलका प्रतिनिधिहरु, सामाजिक व्यक्तित्व र नगरका जनप्रतिनिधि लगायतको पनि उपस्थिति रहेको थियो ।

यहाँ ५ वटा एचडियु सेवा पनि रहने भएको हुँदा स्वास्थ्यमा गम्भिर समस्या आउन खोजेका विरामीलाई  यो वार्डमा राखेर उपचार गरिने नगर अन्तर्गत स्वास्थ्य शाखाले जनाएको छ ।