दमक। राष्ट्रपति विद्यादेवी भण्डारीले महागुरु फाल्गुनन्द जन्म जयन्तीले हामी सबैलाई समाज सुधारको अभियानमा लाग्ने प्रेरणा प्रदान गरोस् भन्ने कामना गरेकी छन् ।

देश तथा प्रवासमा रहेका सम्पूर्ण किरात धर्मावलम्बीलाई आज शुभकामना दिँदै राष्ट्रपति भण्डारीले समाजमा रहेका विकृति र विसंगति हटाउँदै प्रगतिशील, सभ्य र समुन्नत समाज निर्माण गर्न फाल्गुनन्द जयन्तीबाट प्रेरणा मिलोस् भन्ने कामना गरेकी हुन् ।

राष्ट्रपतिले किरात जातीहरुमा धर्म, परम्परा, संस्कार संस्कृतिको मौलिक पहिचान तथा संरक्षणमा जोड दिएका महागुरुको प्रेरणादायी उपदेश र मार्गदर्शनको परिपालना गर्न सकेमा राष्ट्रिय एकतालाई थप सुदृढ एवम् सबल बनाउन सकिने विश्वास व्यक्त गरेकी छन् ।

समाजमा भएका कुरिती कुसंस्कारको विरुद्ध चेतना फैलाउने फाल्गुनन्दलाई समाजका लागि व्यावहारिक आर्थिक नीति नियम बनाउने एक कुशल अर्थविदका रूपमा पनि लिन सकिने राष्ट्रपति भण्डारीले शुभकामना सन्देशमा उल्लेख गरेकी छन् ।

वि. सं. १९४२ साल कातिक २५ गते आजभन्दा १३६ बर्ष अघि इलाममा जन्मिएका फाल्गुनन्दको निधन वि. सं. २००५ सालमा भएको थियो । उनले जीवनको अन्तिम समयसम्म किरात धर्म, भाषा, लिपि, संस्कार, संस्कृति र समाज सुधारका निम्ति काम गरेका थिए । फाल्गुनन्दले समाजसुधारका लागि गरेको अतुलनिय योगदानको कदर गर्दै संघीय लोकतान्त्रिक गणतन्त्र नेपाल भएपश्चातको सरकारले २०६६ साल मंसिर १६ गते १६औं राष्ट्रिय विभूति घोषणा गरेको थियो ।

फाल्गुनन्द जन्मजयन्तीको अवसरमा आज १ नंं प्रदेश सरकारले सार्वजनिक विदा दिएको छ । आज सम्पूर्ण किरात धर्मावलम्बीहरुले महागुरुको १३६औं जन्मजयन्ती देश विदेशमा भव्य रुपमा माउँदै छन् ।

यो बर्ष कोरोना कहरको कारण सामाजिक दुरी कायम गरेर मात्र मनाउन किरात धर्मावलम्बीहरुलाई किरात धर्म साहित्य उत्थान सघका अध्यक्ष डेकन्द्र सिंह थेगिमले बताएका छन् । उनले साँझ घरघरमा दियो बालेर महागुरुको जन्मजयन्ती मनाउन समेत अनुरोध गरेका छन् । त्यसैगरी किरात सत्यहाङमा सेवा संघका महासचिव गंगा साउँदेनले पनि विश्वमा छरिएर रहेका किरात धर्मावलम्बीहरुलाई परिस्थितिलाई मध्यनजर गरेर मात्र कार्यक्रमहरु गर्न आव्हान गरेका छन् ।