काठमाडाैं। राम्राे काम गरेपछि तारिफ हुन्छ नै त्यसैले हाेला विश्वको १०० जना प्रभावशाली महिलाको सूचिमा नेपाली चेली सपना रोका मगर पर्न सफल भएकी छन् । बेलायतकाे ब्रिटिश ब्रोडकास्टिङ कर्पोरेशन (बीबीसी)ले तयार गरेको यस वर्षको १०० जना प्रभावशाली महिलाको सूचिमा म्याग्दीकी सपना परेकी हुन् ।

बीबीसीले मंगलबार यस वर्षको सूचि सार्वजनिक गरेको हो । जसमा नेपालमा बेवारिसे शव व्यवस्थापन गर्दै आएकी १८ वर्षीया सपनाको नाम पनि उल्लेख गरेकाे छ ।

सपनाले हालसम्म काठमाडौंको पशुपतिनाथ आर्यघाटमा तीन दर्जन भन्दा बढी बेवारिसे शव जलाइसकेकी छन् ।
उनले यो काम समाजसेवी विनयजंग बस्नेतसँग मिलेर गरिरहेकी हुन् ।

बीबीसीको सूचिमा फिनल्याण्डकी प्रधानमन्त्रीदेखि कोभिड–१९ विरुद्धको भ्याक्सिन निर्माणको नेतृत्व गरिरहेकी सारा गिल्बर्टसम्मका व्यक्तिहरु छन् । उनले विनयजंग बस्नेत अध्यक्ष रहेको बेवारिसे व्यवस्थापन तथा पुनर्जीवन केन्द्रमार्फत लकडाउनका बेला निःशुल्क खाना समेत खुवाउँदै आएकी छन् ।