दमक। झापाकाे दुइ स्थानीय तह विर्तामाेड नपा र शिवसताक्षी नपामा एक–एक गरी थप दुई जना कोरोना संक्रमितको मृत्यु भएको छ । मृत्यु हुनेमा बिर्तामोड ८ का ७२ वर्षिय गणेशबहादुर कार्की र शिवसताक्षी ९ का ७२ वर्षिय देवप्रकाश लिम्बू रहेका छन् ।

मेची प्रादेशिक अस्पताल भद्रपुरमा उपचारका क्रममा कार्कीको आज बिहान ५ः५० बजे मृत्यु भएको हो । मंसिर ७ गते पिसिआर परीक्षण गराएका उनको रिपोर्ट ८ गते पोजिटिभ आएको थियो । उनको लासलाई ल्याएर अन्त्येष्टि गर्ने तयारी भइरहेको बिर्तामोड नगरपालिकाले जनाएकाे छ । योसँगै कोरोना संक्रमणबाट मृत्यु हुनेको सँख्या बिर्तामोडमा ११ पुगेको छ ।

त्यस्तै गएकाे राती शिवसताक्षीका बुद्ध लिम्बूको बिएण्डसी हस्पिटल बिर्तामोडमा उपचारकाे क्रममा मृत्यु भएको हो । उनलाई मंसिर ७ गते कोशी अस्पताल विराटनगरमा संक्रमण पुष्टि भएको थियो ।

योसँगै झापामा कोरोना संक्रमणबाट मृत्यु हुनेको सँख्या १०५ पुगेको जिल्ला जनस्वास्थ्य कार्यलयले जनाएकाे छ ।