दमक, २६ कार्तिक । भीम आचार्य नेतृत्वको सरकारका पालामा भएका नियुक्ति र निर्णयहरु पुनरावलोकन गरिने प्रदेश नम्बर १ का सामाजिक विकास मन्त्री जयराम यादवले बताएका छन् ।

अघिल्लो सरकारका निर्णय र राजनीतिक नियुक्तिलगायत विषयहरु पूनरावलोकन गर्ने सैद्धान्तिक निर्णय नयाँ मन्त्रिपरिषद्ले गरिसकेको मन्त्री यादवको भनाइ थियो । यादवले भने –‘जे जस्ता नियुक्तिहरु भएका छन्, तिनको पुनरावलोकन गरिनेछ । असंवैधानिक नियुक्तिहरु बदर हुनेछन् ।

बिहीबार झापाको दमकमा समाजवादी विद्यार्थी युनियनको अगुवाईमा आयोजित शुभकामना तथा बधाई कार्यक्रममा बोल्दै यादवले भीम आचार्य मुख्यमन्त्री भएपछि राजनीतिक स्वार्थबाट प्रेरित भएर सबै बजेट बाँड्ने काम भएको भन्दै गठबन्धन सरकार बनेसँगै अब ती सबैमा पुनरावलोकन गरिने जानकारी दिए ।

समयावधि धेरै नरहे पनि आफूले प्रदेशका जनताको हितमा काम गर्ने र जनभावनाको सम्मान गर्ने यादवको भनाइ थियो । उनले सङ्घीयतालाई कार्यान्वयन गर्ने सवालमा वर्तमान सरकारले कुनै कसर बाँकी नराख्ने जिकिर गरे ।

जसपा निकट समाजवादी विद्यार्थी युनियनका विद्यार्थी नेताहरुको अगुवाईमा आयोजित कार्यक्रममा जनता समाजवादी पार्टीका प्रदेश नम्बर १ अध्यक्ष प्रवीण चाम्लिङलगायत प्रदेशका नेता सहभागी थिए । विद्यार्थी नेता सुनिल राईले स्वागत गरेको कार्यक्रममा युवा र विद्यार्थीहरुको उल्लेखनीय सहभागिता थियो ।