दमक, १७ कार्तिक । संघीय लोकतान्त्रिक राष्ट्रिय मञ्चले आजबाट प्रतिनिधिसभा र प्रदेशसभा सदस्य निर्वाचनलाई लक्षित चुनावी अभियानलाई तिब्रता दिएको छ । मञ्चले चुनाव लक्षित भिडियो, अडियो तथा चुनाव प्रचारप्रसार सामाग्रीहरुलाई देशव्यापी आजबाट सार्वजनिक गर्दै चुनावी अभियानलाई तिब्रता दिईएको मञ्चका अध्यक्ष कुमार लिङदेन मिराकले लिम्बुवान खबरलाई बताएका छन् ।

आगामी मंसिर ४ गते देशैभरी एकसाथ हुने प्रतिनिधि र प्रदेश सभा सदस्य तर्फको समानुपातिक र प्रत्यक्ष निर्वाचनमा मञ्चले देशभरीबाट १ सयभन्दा धेरै स्थानहरुबाट प्रत्यक्ष उम्मेदवारी दिएको छ भने प्रदेश नं. ५ बाहेक ६ वटा प्रदेशहरुबाट समानुपातिक उम्मेद्वारी समेत आयोगमा दर्ता गराएको मञ्चका महासचिव तथा निर्वाचन परिचालन समिति संयोजक अशोक चेम्जोङ्ले बताए ।

मञ्चले ताप्लेजुङ, पान्थर, इलाम, झापाका सबै निर्वाचन क्षेत्र, मोरङ र सुनसरीका सबै क्षेत्रहरु, धनकुटा, तेह्रथुम, संखुवासभा, उदयपुर, ओखलढुंगा, सोलुखुम्बु लगायत विभिन्न जिल्लाहरुबाट १ सय भन्दा धेरै क्षेत्रहरुबाट प्रत्यक्ष उम्मेदवारी दिएको हो । २०६४ को पहिलो संविधानसभा देखि निरन्तर चुनाव र पहिचानको आन्दोलनमा सक्रिय रहेको यो पार्टीले पछिल्लो समय लिम्बुवान लगायत १०+१ प्रान्त पहिचानको आधारमा स्थापना हुनु पर्ने कुरामा जोड दिदैं आन्दोलनरत पार्टी हो । संघीय सामुदायिक समाजवाद, संघीय सहअस्तित्ववाद र संघीय इकोइकोनोमि विचारधाराले मात्र देश अग्रगमन दिशा तर्फ उन्नमुख हुने भन्दै लामो समयदेखि मञ्च पहिचानको आन्दोलनमा सक्रिय रहेको छ ।

नेपालकै पहिलो संघीय ढाँचाको पार्टीको रुपमा स्थापित मञ्चले मुख्यगरी संघीयतालाई पहिचानको आधारमा वर्गिकृत गर्दै नेपाललाई हालको ७ प्रदेशबाट शक्तिशाली ११ प्रान्त बनाइनु पर्ने र देशको ७७ वटा सिडिओलाई हटाउनु पर्नेमा जोड दिएको छ । देशको कुल बजेटको ६५ प्रतिशत बजेट कर्मचारीतन्त्रमा खर्च भईरहेकोमा सो खर्चलाई ३५ प्रतिशतमा झार्नु पर्ने र ६ खरब भन्दा धेरै रकमलाई राज्यको कोषबाट खर्चहुन जोगाउँदै विकास, स्थास्थ्य र शिक्षामा सो रकम खर्च गर्नु पर्ने धारणा राख्दै मञ्चले आफ्नो राजनैतिक एजेण्डालाई चुनावी एजेण्डा बनाएर आगामी मंसिर ४ को चुनावमा सहभागी भएको जनाएको छ ।

शिक्षा नीति व्यवहारिक र संघीय ढाँचाको हुनुपर्ने जनाउँदै मञ्चले भाषा आयोग लागू गर्दै भाषाबाटै लोकसेवा आयोगको जाँच दिन पाउने व्यवस्था गर्नुपर्नेमा पनि जोड दिएको छ ।