ललितपुर, १७ कार्तिक । बलिहाङ तङनाम कै समयमा किरात सिरिजंगा युनिक कोड किबोर्ड सार्वजनिक भएको छ । किरात याक्थुङ चुम्लुङ संघीय समितिले शुक्रबार साँझ जुम मार्फक सार्वजनिक गरेकाे हाे ।

युनिक कोड सार्वजनिक भएपछि सिरीजंगा लिपी युनिक कोडमा टाइप गर्न सहज हुने भएको छ । किरात याक्थुङ चुम्लुङ नेपाल र चुम्लुङ दक्षिण कोरियाको संयुक्त रूपमा आयोजना गरिएकाे उक्त कार्यक्रमबाटै प्रयाेग कर्ता सबैलाइ यसकाे व्यवहारिक प्रयोगमा ल्याउन आव्हान गरिएकाे छ ।

युनिक कोड सार्वजनिक गर्दै कार्यक्रमका पूर्व कुलपति बैरागी काइलाले लिम्बू भाषाको विकासको काममा सबैलाई साथ सहयाेग गर्न आग्रह गरे ।

किरात याक्थुङ चुम्लुङका अध्यक्ष प्रेम येक्तेनको अध्यक्षतामा भएको कार्यक्रममा युनिक कोड निर्माता प्राविधिक पवन चित्रकारले यसको प्रयोगका विषयमा जानकारी गराएका थिए ।

किरात याक्थुङ चुम्लङ दक्षिण कोरियाका अध्यक्ष दिर्ज काङभा लिम्बुले सार्वजनिक कार्यक्रममा स्वागत गर्दै लिपी र भाषालाई व्यवहारिक रुपमा प्रयोगमा ल्याउँनु पर्नेमा जोड दिदै लिपीलाइ युनिकाेट मार्फत कम्प्यूटर र ल्यापटप मार्फत चलाउन सहजताका लागि प्रयाेग गर्न अनुराेध गरे ।

युनिक कोड निर्माण गर्न कियाचु दक्षिण कोरियाले आर्थिक संकलन थालेर २७ लाख ६ हजार सहयोग गरेको चुम्लुङकी महासचिव निरन्ती तुम्बापोले जानकारी गराइन् । उनले चुम्लुङले भाषा सम्बन्धि काम गर्न २० लाख अक्षयकोष संकलन गरिएकाे वताइन् ।

कार्यक्रममा प्रज्ञा अमर तुम्याहाङ, डिबी आङबुङ लगायत भाषा तथा लिपी अभियन्ता तथा याक्थुङ सञ्चारकर्मीहरूको सहभागिता रहेको थियो ।