काठमाडौं। यतिवेला जाडो मौसमसँगै देशमा राजनैतिक गर्मागरमी बढेको छ । सत्तरुढ नेकपा सरकार आफ्नै पार्टी खिचलोमा फसेको छ भने राप्रपा लगायत हिन्दुवादी संघसंगठन संघीय लोकतान्त्रिक गणतन्त्रको विरोध गर्दै राजतन्त्र पुनःस्थापना माग गर्दै देशैभरी जनप्रदर्शन गरिरहेको छ ।

वर्तमान नेकपाको कारण देशमा राजावादीहरुको प्रदर्शनले जनताले अढाईसय बर्षमा ल्याएको संघीय लोकतान्त्रिक गणतन्त्र खतरामा परेको संघीय लोकतान्त्रिक राष्ट्रिय मञ्चका संघीय अध्यक्ष कुमार लिङ्देन मिराकले आफ्नाे सामाजिक संजालमा लेख्दै चिन्ता व्यक्त गरेका छन् ।

उनले सामाजिक संजाल फेसबुकमा लोकतन्त्रमा आ–आफ्नो माग राख्न पाइन्छ तर त्यो माग सही या गलत हो सरकारले अनुगमन गर्नु जरुरी रहेकाे लेखेका छन् ।

अध्यक्ष लिङ्देनले प्रदर्शनकारीहरुले राजाको पक्षमा भन्दा पनि संघीयताको विरुद्धमा चर्को नाराहरु लगाइरहदा सरकार मुकदर्शक भएर बसेको आरोप लगाएका छन् । संसारमा कही नभएको संवैधानिक राजाको खोजी गर्नु कति तर्कसंगत हो त ? -उनले सरकारलाई प्रश्न गरेका छन् । संवैधानिक राजा ल्याएर खोपीको देवता बनाएर राख्न संघीय विराेधीहरु आतुर भएको उनको जिकीर छ ।

लामो संघर्ष र जनताको बलिदानी पछि आएको संघीयताको विरुद्ध यसरी नै नारा लागि रहे तमाम संघीयवादी, आदिवासी, खस, मधेशी, थारु, मुश्लिम समुदाय टुलुटुल हेरेर बस्न नसक्ने अध्यक्ष लिङदेनले आफ्नो सामाजिक संजालमा उल्लेख गरेका छन् ।