काठमाडौं। नेपाल सरकारले भिजिट भिसामा मानव तस्कर बढी हुन थालेको भन्दै कढाई गर्ने भएको छ ।

मानव तस्करहरुले भिजिट भिसाको दुरुपयोग गर्दै त्रिभुवन विमानस्थलबाट युवाहरुलाई विभिन्न मुलुकमा पुर्याउने घटना दिनानुदिन बढ्न थालेपछि यस्तो कदम चालेको हो । सरकारले भिजिट भिसा सम्बन्धी कडा प्रावधान राखेर अध्यागमन कार्यविधि संशोधन गर्ने जनाएको छ ।

मेनपावर कम्पनी, वैदेशिक रोजगार व्यवसायी र ट्राभल एजेन्सीका साथै श्रम र अध्यागमन कर्मचारीको मिलेमतोमा विमानस्थलबाट भिजिट भिसाकै आवरणमा मानव तस्करी बढ्दै गइरहेको सरकारको निष्कर्ष छ ।

विगतमा राहदानी, भिसा र अमेरिकी १ हजार डलरका साथमा दुईतर्फी हवाई टिकटका साथ घुम्न जाने देशमा व्यवस्था भए पुग्थ्यो भने अब २० लाख बराबरको व्यक्तिगत जिवन बीमा र कम्तीमा एसएलसी पास गरेको प्रमाणपत्र अथवा अंग्रेजी फरर बोल्न सक्ने अनिवार्य हुने पर्ने व्यवस्था सरकारले गर्ने लागेको जनाएको छ ।

हालसम्म अनुमानित ५० हजार भन्दा धेरै युवाहरु भिजिट भिसामा गएर खाडी मुलुकहरुमा काम गरिरहेको अनुमान रहेको छ । अध्यागमन विभागले कार्यविधि संशोधनको मस्यौदा बनाई छिट्टै गृह मन्त्रालयमा पठाउने जनाएको छ ।