विराटनगर । १ नं. प्रदेशका मुख्यमन्त्री शेरधन राईले आर्थिक मामिला तथा योजना मन्त्री इन्द्रबहादुर आङ्बो (मौसम)लाई पदमुक्त गरेका छन् ।

मुख्यमन्त्री राईले शनिबार साँझ मन्त्री आङ्बोलाई संविधानको धारा १६९ को (२) (ख) बमोजिम पदमुक्त गरेको उनका प्रेस सल्लाहकार ध्रुव सुवेदीले जानकारी दिएका छन् ।

नेपाल कम्युनिस्ट पार्टी (नेकपा) विभाजनपछि प्रचण्ड–नेपाल समूहले मुख्यमन्त्री राईविरुद्ध अविश्वास प्रस्तावको तयारी गरेको विशेष स्रोतबाट बाहिर आएसँगै मन्त्री आङ्बोको पद धरापमा परेको थियो ।

मुख्यमन्त्री राई, नेकपाको ओली समूहका हुन् । पूर्व माओवादी खेमामा आङ्बो प्रचण्ड–नेपालको समूहमा छन् । यो समूहले मुख्यमन्त्री राईविरुद्ध प्रदेशसभामा अविश्वासको प्रस्ताव दर्ता गर्ने तयारी गरेका छन् ।

प्राप्त जानकारी अनुसार प्रचण्ड–माधव समूहका सांसदहरुको हस्ताक्षर संकलन भइरहेको छ । त्यसको सूचना पाएपछि मुख्यमन्त्री राईले आर्थिक मामिलामन्त्री आङ्बोलाई बर्खास्त गरेको हुनसक्ने बताइएको छ ।