दमक। नेकपा कम्युनिष्ट पार्टीले सर्वसत्तावाद र अधिनायकवाद शैलीमा लोकतान्त्रिक गणतन्त्रको मुल्य मान्यत विपरित गतिबिधि गरेको भन्दै प्रमुख प्रतिपक्षी दल नेपाली कांग्रेसले देशभरका १६५ वटै निर्वाचन क्षेत्रमा एकसाथ विरोध प्रदर्शनको तयारी गरेको छ ।

पार्टीले सञ्चालन गरेको केन्द्रियस्तरको आन्दोलनको कार्यक्रम अनुसार आगामी पुष १३ गते अर्थात सोमबार देशभरका १६५ वटै निर्वाचन क्षेत्रमा विरोध रयाली प्रदर्शन र सभा गर्न लागेको हो । ति सभाहरुलाई पार्टीका केन्द्रिय नेताहरुले सम्बोधन गर्ने बताइएको छ ।

यसैबीच झापा क्षेत्र नं ५ को क्षेत्रीयस्तरको विरोध प्रदर्शन तथा सभामा ब्यापक सहभागिता जनाउन पार्टीको क्षेत्रीय समितिले आन्तरिक तयारी गरेको छ । पार्टीका क्षेत्रीय सभापति ढुण्डीराज भण्डारीको सभापतित्वमा आज बसेको क्षेत्रीय बैठकले सो सम्बन्धि विभिन्न निर्णयहरु गरेको क्षेत्रीय सचिव धर्मानन्द भट्टराईले जानकारी दिए ।

दमकमा हुने सो सभालाई कांग्रेस केन्द्रिय सदस्य तथा पूर्व मन्त्री डा. मिनेन्द्र रिजालसहित अन्य नेताहरुले सम्बोधन गर्ने कार्यक्रम रहेको जनाइएको छ । प्रधानमन्त्री केपी शर्मा ओलीको सिफारिसमा राष्ट्रपति बिद्यादेवी भण्डारीले हालै एक्कासी संसद विघटन गरेसँगै नेपाली कांग्रेस कम्युनिष्टको सर्वसत्तावाद र लोकतन्त्र विरोधी शैलीको विरुद्ध सडक संघर्षमा उत्रिएको छ ।