दमक, ६ पुस । संघीय संसद सदस्य समेत रहेकी दमक निवासी नेतृ महेन्द्रकुमारी लिम्बु कांग्रेस केन्द्रीय सदस्यमा निर्वाचित भएकी छिन् । कांग्रेसको १४ औं महाधिवेशनबाट लिम्बु प्रदेश एकबाट महिला कोटामा केन्द्रीय सदस्यमा अत्याधिक मत ल्याएर निर्वाचित भएकी हुन् ।

सोमबार राती सकिएको सो कोटा तर्फको मतगणनाको अन्तिम परिणाममा उनले आफना निकटतम प्रतिस्पर्धीसंग ५ सय भन्दा बढी मतान्तरले केन्द्रीय सदस्यमा निर्वाचित भईन् । लिम्बूले कूल २२७४ मत प्राप्त गरिन् भने उनीसंगको प्रतिस्पर्धामा ताप्लेजुङकी लिला बोखिम र झापाकै गोमा भट्टराई रहेकी थिइन् ।

दमकलाई कर्मथलो बनाएकी लिम्बु करिब अढाई दशक अघिदेखि निरन्तर राजनीतिक यात्रामा सक्रिय उनी प्रजातन्त्रका सेनानी स्वर्गीय मुगाधन राई र कृष्णकुमारीकी छोरी हुन । पार्टीसंगै सामाजिक कार्यमा सक्रिय उनी पार्टीको महासमिति सदस्य तथा नेपाल महिला संघकी केन्द्रिय सदस्य समेत भएर दुई पटकसम्म समानुपातिक कोटाबाट संघीय संसद सदस्य भएर आफनो जिम्मेवारी सम्हालि आएकी छिन् ।

विगतमा झापा कमलस्थित आदिवासी रंगशाला नाम हटाउने भनी दमक चोकमा बोलेका पूर्व प्रधानमन्त्री तथा एमाले अध्यक्ष ओलीले बोल्दै गर्दा माइकसमेत खोसेर चर्चामा आएकी लिम्बु निड्र स्वभाविकी नेत्री हुन् । महिलाहरुमाझ पूर्वमा निक्कै नै लोकप्रिय रहेकी लिम्बुले आफूलाई एक अब्बल नेतृको रुपमा चर्चा पाएकी छिन् ।

झापाबाट दुई नेत्री पनि निर्वाचित

कांग्रेस केन्द्रीय सदस्यमा झापाली दुईजना महिला नेतृ पनि निर्वाचित भएकी छन् । सोमबार सार्वजनिक भएको मत परिणाम अनुसार खुल्ला महिला तर्फबाट पार्टीको केन्द्रीय सदस्यमा नेतृ सरिता प्रसाइँ र सुशीला ढकाल निर्वाचित भएकी हुन् । नेतृ प्रसाइँ राष्ट्रिय सभा सदस्य तथा निवर्तमान केन्द्रीय सदस्य समेत हुन् । उनी यसअघि कृषि राज्यमन्त्री समेत भएकी थिइन् । नेतृ प्रसाइँले २०९६ मत ल्याएर छैठौं स्थानमा जित हासिल गरेकी हुन । केन्द्रीय सदस्यमा निर्वाचित नेतृ ढकालले १८०४ मत प्राप्त गर्न सफल भएकी छिन् । ढकाल नेपाल महिला संघ झापाकी सभापति समेत हुन् ।