विर्तामोड । झापाको पत्रकारितालाई जिम्मेवार र जवाफदेही बनाउन सबै एक जुट हुनुपर्नेमा जोड दिइएको छ । पछिल्लो समय पत्रकारिता क्षेत्रमा विकृति बढेको भन्दै अग्रज पत्रकारहरुले चिन्ता ब्यक्त गरेका थिए ।

नेपाल पत्रकार महासंघ झापाले आयोजना गरेको ‘अवको पत्रकारिता र हाम्रो भूमिका’ बिषयक अन्तरक्रिया कार्यक्रम बोल्दै अग्रज पत्रकार गोविन्द चन्द क्षेत्री, केशव आर्चाय, चिन्तामणी दाहाल, कृष्ण हुमागाँई, लीला बराल, मोहन काजी न्यौपाने लगायतका वक्ताहरुले पत्रकारिता समाजको ऐना भएकोले पत्रकारिता मर्यादित हुनुपर्नेमा जोड दिए ।

उनीहरुले पत्रकारको विकासका लागि अब दक्षतामा जोड दिनुपर्नेमा सुझाव दिए । पछिल्लो समय पत्रकारिता पुजीपति केन्द्रित भएको भन्दै पत्रकारिता जनजनको आवाज बोल्ने हुनुपर्नेमा ध्यान दिन जरुरी रहेको बताइएको छ । झापाको पत्रकारिताको स्थापना र आजको पत्रकारिताका चुनौति, अवसर र महासंघले गर्नुपर्ने कार्यका विषयमा सुझावसमेत दिएका थिए ।

पत्रकार महासंघ झापाको ३३ औं स्थापना दिवसका अवसर पारेर शुक्रबार बिर्तामोडमा अन्तरक्रिया कार्यक्रम गरिएको हो । महासंघ झापा शाखाका अध्यक्ष एकराज गिरीको अध्यक्षतामा भएको कार्यक्रममा नेपाल पत्रकार महासंघ झापाका पूर्वध्यक्षहरु, अग्रज पत्रकार, विभिन्न झापाका पत्रकारका संघ÷संगठनका अध्यक्ष, प्रमुख तथा प्रतिनिधिहरुका सहभागिता रहेको थियो ।

महासंघले ३३ औं स्थापना दिवसको अवसरमा ३३ वटै मैनबत्ति बालेर उद्घाटन गरिएको थियो । उपाध्यक्ष केशव भट्टराईले स्वागत गरेको कार्यक्रमको सञ्चालन सचिव डिकेश लामाले गरेका थिए ।