फाइल तस्वीरः

काठमाडौं, १४ पुष । नेपाल सरकारले एसियन सेन्ट्रल जोन महिला भलिबल च्यालेन्ज कपको विजेता नेपाली खेलाडीलाई जनही ५÷५ लाख नगद पुरस्कार दिने घोषणा गरेको छ ।

बुधबार बसेको मन्त्रिपरिषदको बैठकले सेन्ट्रल जोन महिला भलिबल च्यालेन्जकप बिजेता खेलाडी, प्रशिक्षक र अफिसियललाई नगद पुरस्कार दिने निर्णय गरेको हो । निर्णय अनुसार उपाधि विजेता टोलीमा रहेका १२ जना खेलाडीलाई जनही ५÷५ लाख, २ जना प्रशिक्षकलाई जनही ३ लाख र १ जना अफिसियललाई २ लाख दिने निर्णय बताएइएको छ ।

बंगलादेशको ढाकामा मंगलबार सम्पन्न फाइनलमा उज्वेकिस्तानलाई ३–२ को सेटमा रोमाञ्चक प्रतिस्पर्धामा हराउँदै नेपालले सेन्ट्रल जोन महिला भलिबलको उपाधि रक्षा गरेको थियो । उपाधि विजेता नेपाली टिम बिहीबार स्वदेश फर्कने कार्यक्रम रहेको जनाइएको छ ।