काठमाडौं, १६ पुष । संघीय लोकतान्त्रिक राष्ट्रिय मञ्चले निर्वाचन आयोगमा पार्टी नविकरण गरेको छ । मञ्चको गत मंसिर २६ र २७ गते सम्पन्न तेस्रो संघीय राष्ट्रिय महाधिवेशन बारे सम्पूर्ण जानकारी सहित मञ्चले पार्टी नविकरण गरेको हो ।
मञ्चको संघीय कार्यालयले महाधिवेशनबाट निर्वाचित कार्य समिति र संसोधित विधान सहित पार्टी नविकरण गर्न आयोग पुगेको संघीय महासचिव शान्ता योङहाङले लिम्बुवान खबरलाई जनाएकी छन् । उनले पार्टीका संघीय अध्यक्ष कुमार लिङदेन मिराककाे उपस्थितिमा मञ्चकाे विभिन्न प्रान्तीय नेताहरूकाे उपस्थितिमा पार्टी नविकरण गर्न आयोग पुगेको बताइन् ।
२०६२ सालमा स्थापना भई २०६४ सालमा निर्वाचन आयोगमा दर्ता भई विभिन्न निर्वाचनमा भाग लिएको संघीय लोकतान्त्रिक राष्ट्रिय मञ्च नेपालको एकमात्र संघीय संरचनाको पार्टी भएको मञ्चले सधै जिकीर गर्दै आइरहेको छ । देशलाई १०+१ प्रान्तीय संरचनामा लानु पर्छ भन्दै विगत १० बर्ष देखि निरन्तर आन्दोलनरत दल मञ्चले सो संरचनालाई विधानमा शक्तिशाली बनाएको छ ।
मञ्चले विधानमा संघीय कार्य समिति पछि प्रान्तीय मञ्चलाई शक्तिशाली बनाएको छ । प्रदेशलाई समन्वय परिषदको रुपमा राखेको छ भने जिल्ला, क्षेत्र र प्रदेश क्षेत्रलाई कार्यकारिणी अधिकार दिने समेत विधानमा उल्लेख गरेको छ ।
शुक्रबार बुझाइएको कार्य समितिमा ४४ सदस्यीय पदाधिकारी सहित कार्य समितिको नामावाली बुझाइएको महासचिव योङहाङले बताइन् । मञ्चको विधानमा संघीय समिति २९९ जनाको हुने उल्लेख गरेको मञ्चले कति सदस्यीय कार्य समिति आयोगमा बुझाईएको भने खुल्लाईएको छैन । यद्यपी आयोगमा ३३ प्रतिशत महिला अनिवार्य हुनुपर्ने प्रावधान भएकोले महाधिवेशनमा महिलाहरुको नोमिनेशन न्यून भएको हुँदा पार्टीमा सहकस भएको समेत उनले भनिन् ।
समानुपातिक र समावेशीताको कुरा गर्ने पार्टी मञ्च मै महिलाहरु प्रति कतै अनुदार त भएको होइन भन्ने प्रश्नमा उनले भनिन् मञ्चले पार्टी स्थापनाकाल देखि नै समानुपातिक समावेशीताको कुरा उठाएको हुँदा महिलाहरु प्रति मञ्च कहिल्यै अनुदार हुन सक्दैन । पहिचान र सह–अस्तित्वको लडाईमा सबैको समानअधिकार हुने समेत उनले थपिन् ।
मञ्चलाई आयोगले दिएको समयसिमा पुषको १८ गतेसम्म रहेको हुँदा केही दिन देखि सम्पूर्ण डकुमेन्ट मिलाउन संघीय मञ्चका अध्यक्ष लिङदेन, संघीय महासचिव द्वय अशोक चेम्जोङ र योङहाङ, संघीय सचिवहरु चन्द्र कन्दङ्वा, दिलकुमार लावती, शेर्पा प्रान्त, तामाङसालिङ, दलित र खसानका नेताहरु सबै जुटेको संघीय अर्थ सचिव सुर्यमान आङबुङले जानकारी दिएका छन् ।
मञ्चका संघीय महासचिव चेम्जोङले आगामी माघ महिना देखि सबै प्रान्तहरुमा सासुअ (सांगठानिक सुदृणीकरण अभियान) संचालन गर्ने बताए । सांगठानिक स्कुल, प्रशिक्षण, दृष्टिकोण, १०+१ प्रान्तको अवधारण बारे जनताको घरघरमा पुगेर आगामी निर्वाचिन लक्षित कार्यक्रमहरु संचालन गर्ने बताएका छन् ।
मञ्च १६ बर्ष देखि निरन्तर राजनीतिक कृयाकलाप गर्दै अाइरहेकाे पार्टी हाे । हाल प्रदेश नं. १ मा थ्रेस हाेल्ट कटाउँदै १ प्रदेश सदस्य समानुपातिक सिट जितेकाे छ भने पाँचदलीय गठबन्धनमा सरकारमा समेत सहभागी भएकाे छ ।
Related