काठमाडौं, ११ पुष । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्रीमा नियुक्त भएका छन् । आइतबार साँझ राष्ट्रपति विद्यादेवी भण्डारीले प्रचण्डलाई प्रधानमन्त्रीमा नियुक्त गरेकी हुन् ।
आइतबार प्रचण्डले आफ्नो दल नेकपा माओवादीसँगै नेकपा एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, जनमत पार्टी र नागरिक उन्मुक्ति पार्टी त्यसैगरी तीन स्वतन्त्र संसदहरुको समर्थनसहित प्रधानमन्त्रीमा दाबी पेश गरेका थिए ।
२७५ सदस्यीय प्रतिनिधिसभामा प्रचण्डले सात वटा दलका १६६ र ३ स्वतन्त्र गरी १६९ सांसदको समर्थन पाएका छन् । स्वतन्त्र सांसदहरु प्रभु साह, किरणकुमार साह र अमरेशकुमार सिंहले पनि उनलाई समर्थन गरेका हुन् ।
राष्ट्रपति विद्यादेवी भण्डारीले संविधानको धारा ७६ (२) अनुसार प्रतिनिधसभा निर्वाचनमा कुनै पनि एक दलको बहुमत नआएकाले मिलीजुली सरकार बनाउन आइतबार बेलुकी ५ बजेसम्मको समय दिएकी थिइन् ।
राष्ट्रपतिले दिएको समयभित्र प्रचण्डले १६९ सांसदको समर्थनसहित प्रधानमन्त्रीमा दाबी पेश गरेका हुन् ।
आज(सोमबार) दिउँसो ४ बजे प्रचण्डले प्रधानमन्त्रीका रुपमा शपथ ग्रहण गर्ने राष्ट्रपति कार्यालयले जनाएको छ । यसैगरी आजै सानो आकारको मन्त्रीपरिषद समेत प्रधानमन्त्री प्रचण्डले आजै बनाउने जनाएको छ ।
हेर्नुहोस् राष्ट्रपति कार्यालयको विज्ञिप्ति ः