काठमाडौं, १५ पुष । गुरुङ समुदायले नयाँ वर्षको रुपमा मनाउने तमु ल्होसार पर्व आज देश विदेशमा धुमधाम मनाइँदैछ । तमु ल्होसारलाई राष्ट्रिय पर्वको रुपमा मान्दै आज सरकारले सार्वजनिक बिदा दिएको छ ।

खास गरी तमुवान क्षेत्रका जिल्लाहरु लमजुङ, गोरखा, तनहुँ, स्याङ्जा, मनाङ, कास्की, पर्वतलगायतमा तमु ल्होसार पर्व मनाउने गुरुङ्जातीहरुले आफ्नो मौलिक सांस्कृतिक झाँकीसहित भव्यताका साथ मनाउने गर्दछन् ।

आज काठमाडौं उपत्यकामा बसोबास गर्ने गुरुङ समुदायले पनि टुँडिखेलमा बृहत झाँकी सहित भव्यरुपले यो पर्व मनाउँदैछन् । पर्वको अवसरमा आज टुँडिखेलमा सांस्कृतिक कार्यक्रमका साथै गुरुङ समुदायका परिकारको समेत प्रदर्शनी गरिंदैछ । त्यसैगरी प्रदेश नं. १, बाग्मती प्रदेश, लुम्बिनी प्रदेश, सुदुरपश्चिम लगायतका गुरुङ् बाहुल्य प्रदेशहरुमा पनि यो पर्व मनाइदैछ ।

गुरुङ् समुदायले ‘तो ल्हो’ (बाघ वर्ग) लाई विदाई गर्दै यो बर्ष ‘हि ल्हो’ (विरालो वर्ग)को स्वागत गर्दै यो तमु ल्होसार मनाउँदैछन् ।

आज तमु ल्होसारको अवसरमा राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री पुष्पकमल दाहाल प्रचण्डलगायतले देश विदेशमा बसोबास गर्ने सम्पूर्ण गुरुङ समुदायलाई शुभकामना दिएका छन् ।