दमक, १९ मंसिर । इलाम जिल्लाको फाक्फोकथुम ४ स्थित लिम्बु गाउँमा  चासोक तङ्नाम रमाईलो मेला लाग्ने भएको छ । बिगत १६ बर्ष देखि निरन्तर लागिरहेको मेला विगत बर्ष झैं मंसिर २५ र २६ गते दुई दिन लाग्ने मेलाका परिकल्पनाकार दिपक योङ्हाङ्ले बताएका छन् ।

खेलकुद, भाषा, कला, साहित्य र संस्कृतिको सम्बद्र्धन संरक्षण गर्ने उद्देश्यका साथ लाग्दै आएको उक्त मेलामा यो बर्ष पुरुष फुटबलका साथै महिला फूटलबल प्रतियोगिता समेत थप गरिएको वताइएको छ । केलाङ् प्रतियोगिता, पःलुङ् (छेलो) का साथै स्लो बाइक रेस समेतको आयोजना गरिने योङहाङ्ले जानकारी गराए ।

पुरुष फूटबलमा १६ टिम र महिला फूटबलमा ८ टिक सहभागी भएको समेत उनले बताए । पुरुष फूटबलको पुरस्कार राँशी प्रथम ५५ हजार पाँच सय ५५, दोस्रो २५ हजार पाँचसय ५५ त्यसैगरी महिलाको प्रथम २० हजार, दोस्रो हुनेलाई १० हजार साथै मेडल र प्रमाणपत्र दिने आयोजकले बताएको छ । यसरी नै केलाङलाई पहिलो हुने १० हजार र दोस्रो हुनेलाई ५ हजार पुरस्कार राखिएको छ भने स्लो बाइक रेस विजेतालाई ५ हजार र पःलुङ् छेलोलाई १ हजार पुरस्कार दिने आयोजकले जनाएको छ ।

महिला फूटबलको फाइनल खेल मंसिर २५ र पुरुष फूटबल लगायत अन्य खेलहरुको फाइनल २६ गते सम्पन्न गर्ने आयोजकले जनाएको छ ।

लिम्बू (याक्थुङ्) जातीहरुको महान चाड चासोक तङनामको अवसरमा लाग्ने उक्त मेलाको अन्तिम साँझ बृहत सांगीतिक, सांस्कृतिक कार्यक्रम समेत आयोजना हुने परिकल्पनाकार योङहाङ्ले लिम्बुवानखबरलाई बताएका छन् ।