दमक, २३ मंसिर । प्रधानमन्त्री केपी ओलीको गृहजिल्ला झापाको दमकमा पहिचानवादीहरूले कालो झण्डा देखाएर प्रदर्शन गरेका छन् । प्रधानमन्त्री ओली पुग्ना साथ पहिचानवादीहरुले प्रदर्शन गरेका हुन् ।

प्रदेश नं. १ को नाम गोत्रीय कोशी राखेसँगै पहिचानवादीहरुले निरन्तर विरोध जनाइरहेका छन् । प्रदेश नं. १ पुनः नामाङ्कन संयुक्त संघर्ष समितिले निरन्तर आन्दोलन गरिरहेको छ ।

प्रधानमन्त्री ओलीले आदिवासी जनजाति र पहिचानवादीहरुमाथि अपमानजनक अभिव्यक्ति दिएसँगै प्रदेश १ मा विरोध जनाइ रहेको छ । आजको प्रदर्शनमा प्रहरी र प्रदर्शनकारी बिच हात हालहाल समेत हुँदा केही प्रदर्शनकारी सामान्य घाइते भएका छन् । यस्तै दमकस्थित आकाशेपुल नजिकैबाट फरकफरक समयमा ११ जना प्रदर्शनकारीलाई प्रहरीले नियन्त्रणमा लिएको थियो ।

प्रहरीले शान्तिपूर्ण आन्दोलन गरिरहेको बेला पहिचानवादी मोर्चाका संघीय सदस्य केदार धिमाल, गंगा सेर्मा राई, देउमान लिम्बु साम्रा, त्यसैगरी जसपा, नेपाल उर्लाबारीका अध्यक्ष मातृका धिमाल, नेपाल जनमुक्ति पार्टीका सचिव एल बि पालुङ्वा, सोम चेम्जोङ फोराहाङ, तीर्थ खड्का, संघीय लोकतान्त्रिक राष्ट्रिय मञ्चका नेता विवेक सुनुवार र याम लोरिङ्न, किरात याक्थुङ चुम्लुङ लिम्बुवान प्रदेश सदस्य विक्रम वनेम फागो र दिनेश किरातीलाई प्रहरीले नियन्त्रणमा लिई इलाका प्रहरी कार्यालय दमकमा राखिएको थियो ।

उनीहरूलाइ साँझ ७ बजे प्रहरीले रहाइ गरेका छन् । रिहाइ पछि इलाका प्रहरी कार्यालय अगाडि पहिचानवादीहरूले काेणसभा गरेर प्रधानमन्त्री विरूद्ध नारा लगाएका थिए ।

संयुक्त संघर्ष समितिले पक्राउ परेको केही घण्टामै पक्राउ परेकाहरुलाई तुरुन्त रिहाई गर्न सरकारसँग माग गरेको थियो भने नगरिए शसक्त आन्दोलन गर्ने जनाएको थियो ।

यसअघि राष्ट्रिय स्वतन्त्र पार्टीका कार्यकर्ता– समर्थकले मेचीनगरमा प्रधानमन्त्री ओलीलाई कालो झन्डा देखाएका थिए।

प्रधानमन्त्री ओली दमक नगरपालिका– ३ दापगाँछीमा बनेको १८ तले भ्यु टावरको उद्घाटनका लागि आइतबार झापा आएका हुन् ।
दमकमा बनेको सो भ्यू टावर नक्सा समेत पास नगरि बनाइएको भनी चौतर्फी विरोध भई रहेको छ ।