दमक, २४ मंसिर । झापा जिल्ला विर्तामोड नगरपालिकाका पूर्व मेयर ध्रुवकुमार शिवाकोटी जबरजस्ती करणी गरेको अभियोगमा पक्राउ परेका छन् । जिल्ला प्रहरी कार्यालय झापाका अनुसार घरेलु कामदार १७ वर्षीया बालिकामाथि जबरजस्ती गरेको अभियोगमा उनी पक्राउ परेका हुन् ।

झापा जिल्ला प्रहरीका प्रवक्ता डिएसपी कृष्णकुमार चन्दका अनुसार पीडित बालिका कलेज पोसाकमै काँकडभिट्टा नाकाबाट भारतको पानीट्यांकीतिर जाँदै गर्दा उनलाई आफन्त नेपाल नामक संस्थाका प्रतिनिधिहरूले रोकेर सोधपुछ गरेका थिए ।

त्यस क्रममा घटनाबारे थाहा भएपछि प्रहरी समेतको सहयोगमा उनलाई उद्धार गरिएको जिल्ला प्रहरी कार्यालयले जनाएको छ ।
बालिकाले उद्धारपछि आफूमाथि पूर्वमेयर शिवाकोटीले जबरजस्ती करणी गरेको बताएकी छिन् । सोही आधारमा पूर्वमेयर शिवाकोटीलाई पक्राउ गरिएको प्रहरी भनाई रहेको छ ।

बालिकाकी आमा भारतमा बस्ने गरेको र उनको बुबा नभएको प्रहरीले जनाएको छ । बालिकाका अनुसार शिवाकोटीले पढाइदिने सर्तमा घरेलु कामदारका रूपमा राखेका थिए ।

तत्कालीन अनारमनी गाविसको अध्यक्ष भइसकेका एमाले नेता शिवाकोटी २०७४ मा बिर्तामोडको मेयरमा निर्वाचित भएका थिए ।